بھارت عالمی چینی بینک دا پردھان گاہک۔سانوں ہور قرضے دیو،مودی۔پاکستان کتھے؟

2018 ,جون 27



لاہور(مانیٹرنگ رپورٹ)ورلڈ بینک، آئی ایم ایف تے ایشین ڈویلپمنٹ بینک وانگ ہن چینیاں عالمی بینک کھڑا کیتا ہے جس دی تریجی سلانہ میٹنگ بھارت دے فنانشل مرکز ممبئی وچ ہوئی ہے۔ ایس میٹنگ نال گل بات کردے بھارتی وزیراعظم مودی ہوراں آکھیا ہے پئی بینک سرمایہ کاریاں نوں سو ارب ڈالر تیک کرے تے سود دا تناسب وی گھٹائے۔ ایشین انفراسٹکچر انویسمنٹ بینک (اے آئی آئی بی) دو سال پہلاں کم شروع کیتا سی تے تیزیاں نال اپنے پیر پھیلا رہیا ہے۔ چیتے رہے پئی بھارت تے چین دے نیڑے آن نوں امریکہ تے اوس دے پاکستانی سجن چنگا نہیں سمجھدے۔چینی میڈیا دی خبر وچ دسیا گیا ہے پئی ہن تیک بھارت ساڈھے چار ارب ڈالر دے قرضے لی چکیا ہے تے ایس رقم وچ وڈا اصافہ ہوئے گا۔بینک دے پردھاناں دا آکھنا ہے پئی ایہہ پہلا عالمی بینک ہے جس وچ 75فیصدی رقماں ایشیائی نیں۔مودی ہوراں دا پک ہے پئی ایہہ بینک بھارت وچ انفراسٹکچر وچ وڈی سرمایہ کاریاں کر سکدا ہے۔سو ارب ڈالر نال شروع ہون والے ایس بینک وچ بھارت، چین توں بعدوں، دوجا وڈا حصہ دار ہے جس دا حصہ ساڑھے ست فیصدی جے۔چیتے رہے پئی ایس بینک وچ روس تے جرمنی وی حصہ دار نیں۔ایس سال بینک ایشین انفراسٹکچر فورم وی بنائے گا۔
پاکستان ایس وچ کتھے ہے؟ پاکستان تے بھارت شہنگائی کوپریشن آرگنائزیشن(ایس سی او) دے وی ممبر نیں پر آپسی جھیڑیاں پاروں رل کے کم کرن توں پراں نیں پر چینیاں نال رلن لئی تیار۔سی پیک لیاون والے وزیراعظم نال جو ملک پاکستان وچ ہویا اوہ اپنی تھاں وڈا سوال ہے؟بھارت نال سانگے ٹھیک کرن دے خلاف وی نواز شریف نوں نشانہ بنایا گیا۔ سوال ایہہ ہے پئی چین کار ویہار پاروں سب نوں رلتی کرنا چاہندا ہے پر پاکستان تے بھارت وچ ایسے دھڑے تگڑے نیں جیہڑے رل کے چلن لئی تیار نہیں۔پر اج یا کل انہاں نوں اپنے آپ نوں بدلنا ہو سی۔
بینک دے نائب صدر تے کارپوریٹ سیکٹری سر ڈینی الیگذنڈر دا کہنا ہے پئی اساں اک غیر سیاسی ادارہ ہاں تے عالمی سرمایہ کاریاں دے اصولاں نوں سامنے رکھ کے منصوبے بنادے ہاں۔ساڈا نعرہ جھکنا،شفاف رہنا تے سر سبز ہونا جے۔

متعلقہ خبریں