لاہور(مانیٹرنگ رپورٹ)عالمی اشرافیہ وچ تجارتی جنگاں پاروں وڈے پاڑ تے گھپے نظر آ رہے نیں۔ایس پاڑ دا لشکارا پاکستان جیسے ملکاں وچ وی وادھو پئی کون کس دا بلارا ہے؟ ایہہ گل ہن لکویں نہیں۔ایرانی ایٹمی ڈیل توں نکلن بعدوں امریکیاں دی اوکڑاں ودھ رہیاں نیں اتے چین بعدوں ہن یورپی یونین وی امریکی تجارتی پابندیاں دے جواب وچ یورپ آون والی امریکی شیواں تے پابندیاں لا دتیاں جیہڑی اج توں لاگو ہو جا سن۔روسی میڈیا پہلاں ہی خبر دے چکیا ہے پئی روس وی امریکہ تے تجارتی پابندیاں ودھا دے گا۔ فرانس24نامی مشہور فرانسیسی میڈیا گروپ ایس نوں اک مندا کم آکھدے ہوئے خبر دتی ہے پئی عالمی سٹاک منڈیاں تے پہلاں ہی مندے ول سن تے ایس بعدوں کم ہور چوڑ ہوئے گا۔ کیہہ ڈالر تے پاونڈ دی حکمرانیاں دا زمانہ مک رہیا ہے؟چیتے رہے پئی امریکہ ولوں یورپی کمپنیاں تے اصافی ٹیکس لگن بعدوں برسلز پہلاں ہی امریکی شیواں تے ساڈھے ترے ارب ڈالر دے جوابی ٹیکس لا چکیا ہے۔میکسکو تے کنیڈا توں وی اجہی خبراں آ رہیاں نیں تے امریکیاں نوں ٹرمپ ڈاھڈا اوکھا کر دتا ہے۔
یورپی یونین وچ28ملک نیں تے انہاں امریکی شراباں، جینز دے کپڑیاں وغیرہ اتے موٹر سائیکلاں تے اصافی ٹیکس لاون توں اپنی نویں پالیسی دا اعلان کیتا ہے۔ایہہ تجارتی جنگ ہن اگے ودھے گی تے عالمی پردھان کرنسی ڈالر تے ایس دا سب توں بھیڑا اثر ہوئے گا۔اے ایف پی نال گل کردے ہوئے عالمی معاشی ماہر اتے ایس ای بی دے چیف اکانومسٹ رابرٹ Bergqvist آکھیا ہے پئی ’’اساں اک تجارتی جنگ وچ ہاں اتے ایہہ ہور تیز ہوئے گی‘‘۔ااکھیا جا رہیا ہے پئی یورپ والے چمڑے تے کپڑے توں بنی امریکی شیواں تے اصافی ٹیکس لا دین گے۔ یورپی کمیشن وچ تجارتاں دے وائس صدر جرکی ہوراںآکھیا ہے پئی ہن سانوں متبادل منڈیاں ول جانا ہوئے گا۔