کانگریس کی شرمناک شکست میں سربراہ راہول گاندھی بھی اپنی نشست ہاربیٹھے ، جانتے ہیں ان کو شکست کس اداکارہ نے دی ؟

نئی دہلی (مانیٹرنگ ڈیسک) انڈین نیشنل کانگریس کے صدر راہول گاندھی نے لوک سبھا انتخابات میں اپنی شکست تسلیم کرلی۔انتخابات میں شکست کے بعد راہول گاندھی نے اپنے پیغام میں کہا کہ وہ مودی کو منتخب کرنے پر بھارتی عوام کی رائے کا احترام کرتے ہیں، آج اپوزیشن کرنے کا نہیں، مودی کو مبارک باد دینے کا وقت ہے ، رہنما اورکارکن ہمت مت چھوڑیں کیونکہ نظریاتی جنگ جاری رہے گی ۔راہول گاندھی نے خود کی شکست کے حوالے سے کہا کہ امیٹھی کے عوام نے جو فیصلہ دیا ہے اس کااحترام کرتاہوں۔خیال رہے کہ بھارت کے لوک سبھا انتخابات میں حکمران جماعت بی جے پی کے اتحاد نے واضح اکثریت سے کامیابی حاصل کی ہے جبکہ کانگریس کی قیادت میں بننے والے اپوزیشن کے اتحاد کو بد ترین شکست کا سامنا کرنا پڑا ہے۔ کانگریس کے صدر راہول گاندھی نے امیٹھی (اتر پردیش) سے الیکشن میں حصہ لیا تھا تاہم انہیں سابق اداکارہ اور یونین منسٹر سمرتی ایرانی کے ہاتھوں شکست کا سامنا کرنا پڑا ہے۔ لوک سبھا کی اس نشست پر سمرتی ایرانی نے 49 فیصد (ایک لاکھ 4 ہزار 498) ووٹ حاصل کیے اور کامیاب قرار پائیں جبکہ راہول گاندھی صرف 44 اعشاریہ 4 فیصد (94 ہزار 732) ووٹ حاصل کرپائے۔ دوسری جانب الیکشن میں کامیابی کے بعد نریندر مودی نے پیغام جاری کرتے ہوئے کہا کہ ” ایک ساتھ ہم ترقی کریں گے ،ایک ساتھ پھلیں پھولیں گے ،ایک ساتھ مل کر ہم مضبوط بھارت بنائیں گے ،ایک مرتبہ پھر بھارت جیت گیا ۔“ اپنے پیغام کے ساتھ بھارتی وزیراعظم نے ایک نیا نعرہ بھی لگایا کہ ’’ ویجائی بھارت‘‘ (کامیاب بھارت)۔ادھربھارت میں ہونے والے انتخابات کے نتائج آنا کا سلسلہ جاری ہے جس میں حکمران جماعت بی جے پی مسلسل کامیابیاں سمیٹتی ہوئی نظر آ رہی ہے۔میڈیا رپورٹس میں بتایا گیا ہےبھارتی انتخابات کے تحت 519 نشستوں کے سرکاری نتائج آگئے ہیں۔