وویک اوبرائے پاکستانی اداکارہ کے سحر میں گرفتار ہوگئے ہیں

لاہور(ویب ڈیسک)معروف مصورہ اور اقوام متحدہ پاکستان کی خیر سگالی سفیر منیبہ مزاری ایک جانی پہچانی شخصیت ہیں۔ معذوری کے باوجود بلند اور قد آور شخصیت کی مالک اس خوبصورت فنکارہ نے بالی ووڈ اداکار وویک اوبرائے سے ملاقات کی اور انہیں اپنی ذہانت اور حوصلے سے بے حد متاثر کیا۔

تفصیلات کے مطابق منیبہ اور وویک اوبرائے کی یہ ملاقات ملائیشیا میں ہوئی جہاں منیبہ ایک بین الاقومی کانفرنس میں بطور مقررہ شریک تھیں۔تصاویر میں دیکھا جا سکتا ہے کہ وویک اوبرائے منیبہ سے مل کر بے حد خوش اور ان کے صلاحیتوں سے متاثر ہوئے۔منیبہ اس سے قبل بھی کئی بین الاقوامی کانفرنسوں میں بطور مقررہ شریک ہو کر معذوری کے خلاف اپنی جدوجہد سے آگاہ کرچکی ہیں۔وہ 7 سال قبل ایک کار حادثے کا شکار ہوگئی تھیں۔ حادثے میں ان کی اسپائنل کورڈ کو نقصان پہنچا تھا جس کے سبب وہ کئی سال سے وہیل چیئر پر ہیں۔اس کے باوجود ان کے عزم اور حوصلے میں کمی نہیں آئی، اور معذوری کے بعد بھی وہ نہ صرف مصوری جاری رکھے ہوئے ہیں بلکہ پاکستان میں صنفی مساوات کے لیے بھی کام کر رہی ہیں۔سنہ 2015 میں ان کی ہمت اور بہادری کو دیکھتے ہوئے اقوام متحدہ پاکستان کی جانب سے انہیں خیر سگالی سفیر برائے خواتین بھی مقرر کیا گیا تھا۔اقوام متحدہ کے مطابق منیبہ کی کہانی دنیا بھر کے معذور افراد کے لیے ایک مثال ہے جنہوں نے معذوری کو اپنی راہ میں رکاوٹ نہیں بننے دیا اور اپنے خوابوں کی تعبیر حاصل کی۔