صوفی مشعال خان کیس: لوک اگے پر سول ملٹری قیادت تے ریاست پچھے؟ کیہہ ریاست کجھ کرے گی؟

 
لاہور(مانیٹرنگ رپورٹ)اوہ مشعال دی آواز نوں دباون آئے سن، انہاں اوس نوں قتل کر چھڈیا پر اج پورا پاکستان مشعال نوں جاندا ہے۔خلق دی زبان نوں خدائی نقارہ سمجھن والے جاندے نیں کہ وقوعہ ہون دے پہلے دس گھنٹیاں وچ ریاست ،حکومتاں،ادارے تے سیاستدان خموش سن پر سوشل میڈیا تے نقارہ بربر وجدا رہیا، ویڈیو وی آئی تے مشعال دیاں سوہنیاں من موہنیاں گلاں وی پوسٹ ہوندیاں رہیاں۔چند گھنٹیاں وچ مشعال نال پیار کرن والیاں دی گنتری وادھو ہو گئی۔میڈیا دے اک حصہ نے وی لوکاں نال سانجھ کیتی۔اج خبر آئی ہے کہ یونیورسٹی ایڈمنسٹریشن مشعال دے خلاف سی کیونجے اوس کسی چینل تے یونیورسٹی دے گھاٹیاں بارے گل کیتی سی۔اوس وائس چانسلر نہ ہون دی وی گل کیتی سی۔یونیورسٹی والیاں ترے منڈیاں خلاف نوٹیفکیشن کڈیا سی کہ انہاں وچوں مشعال تے رہیا ہی نہیں، عبداللہ زخمی ہے اتے زبیر بارے کجھ پتہ نہیں۔اک وقوعے دی دو ایف آئی آراں کیوں؟ جے20 بندے سی سی ٹی وی کیمریاں توں نظر آچکے نیں تے پھڑیچے بندے تے نرے اٹھ کیوں؟ پھڑیچیا تحصیل ناظم کون ہے؟ کیہ اوہ باہروں بندے لیایا سی؟سوال وادھو پر جواب کوئی نہ کیونجے جواب تے ریاست دینا ہے۔