پاکستان: بامیان دے بت ڈیگن توں بچ سو؟ مداری سست، باندر تیز

لاہور(مانیٹرنگ رپورٹ)اخیری دناں وچ طالبان والے ایڈا ڈر چکے سن کہ آپدے سائیاں توں وی ڈردے سن۔انہاں دی بے یقینیاں ایڈی ودھ گیاں پئی انہاں آپدا رعب پاون لئی، ہورے، صدیاں توں بامیان دے پہاڑاں تے کندہ کیتے اصلی مہاتما ,گوتم بدھ دی شبیہاں نوں ڈھاون دا فیصلہ کر لتا۔ایس بند گلی وچ انہاں نوں کس وڑن دا آکھیا، اوہ ضرور ’’اندر دا بندہ‘‘ ہو سی کہ جیہڑے انہاں دے خلاف نہیں سن انہاں وی آکھیا پئی انہاں نوں اکا ہی فارغ کرو۔سینیٹ دی چوناں توں پہلاں کوئی نواں تماشہ کھڑا کرن دی کوششاں وی اینج دیاں ہی جاپدیاں نیں۔غیر ملکیاں دی بازیابیاں بعدوں جیہڑیاں طنزیہ تھپکیاں ٹرمپ ولوں ملیاں اوہ حاکم دا موڈ سمجھن دا اشارہ۔ہر کوئی ڈبل گیم کھیڈ رہیا ہے۔ٹرمپ دے بیان ہر دھڑے لئی وکھ وکھ موجود۔رہا ہون والا غیر ملکی آکھدا ہے میری بیوی نوں طالبان ریپ کیتا پر طالبان ایس توں انکاری اتے بی بی سی دوناں خبراں نوں وڈا کر کے چھاپیا۔سچ گول مول تے رولا وادھو۔ٹرمپ آکھدا ہے حقانی نیٹ ورک توں پاکستان نے غیر ملکیاں نوں چھڈایا پر پاکستان آکھدا ہے اساں طالبان توں بندے چھڈائے نیں۔پاکستان وچ وی ڈبل گیماں وادھو۔سیاستداناں رل مل نواز دے مڑ صدر بنن نالوں آپدا مستقبل محفوظ کیتا پر اپوزیشن نرے شو کاز نوٹس اتے بیان دے کے کھپ وی پا رہی ہے تانجے الزام نواز تے ہی لگے۔رینجرزوالا وقوعہ وی ہو گیا تے جمہوریت تے آئین بارے تجدید عہد وی۔دھرمی تقدس نال جڑیاں سیاستاں تے سب رلتی اتے کھپ وی سب پا رہے نیں۔ڈگڈگی کجھ ہور چال چلدی ہے اتے مداری دا ذہن کجھ ہور سوچدا ہے تاں ہن باندر کیہہ کرے؟سینیٹ دی چوناں بارے سوچ سوچ کے ہی اوہ ادمویا ہویا ہے۔اوہ ویریاں دا جھگا ساڑنا چاہندا ہے، سینیٹ دی چوناں توں پہلاں، بھانویں بامیان دے بت ہی کیوں نہ ڈگانے پین۔ پر ہر کوئی اینج نہیں سوچدا۔کجھ گلاں یا فیصلے پکے نیں تے بہوں سارے کچے کہ جے پکیاں گلاں نوں وی چھیڑیا گیا تاں سب چوڑ ہو جا سی۔سینیٹ دی چوناں تے قومی الیکشن، سی پیک وانگ پکیاں گلاں نیں اتے کچیاں گلاں نوں پکن وچ ہورے کڈا چر لگے۔بھٹو دے عدالتی قتل دا فیصلہ اگلے25سال تیک سیاستاں دا وچلا دھرا سی کہ 28جولائی دا فیصلہ وی اوہی تھاں لیندا جا رہیا ہے۔نویں چوناں تیک ہر فیصلہ ایس نال جوڑ کے ہی ویکھیا جائے گا۔جے مداری باندراں دی تیزیاں پاروں فیصلے کرن تاں گل بامیان والی ہی مقدر کہ بند گلی توں بچنا ہی سیاستاں دا پہلا اصول۔