ملکہ معافی منگے ،تلاشی دے۔ امیر ٹیکس بچائے، نقصان عوام دا۔ جرمی کوربن۔ پاکستانیوں پڑھو

لاہور(مانیٹرنگ رپورٹ)برطانیہ دے اپوزیشن لیڈر جرمی کوربن اخیر اوہ گل کر ہی دتی جیہڑی2013توں یورپی یونین کر رہی سی اتے جس توں بچن لئی ہشیار برطانوی اشرافیہ نے بریگسٹ تک کروا لتا۔جرمی کوربن سدھی سدھی گل کردے ہوئے آکھیا پئی جداں امیر ٹیکس بچائے گا تے نقصان کس دا ہوئے گا؟ حکومت نوں گھٹ رقماں ملن گیاں تے تعلیم اتے ہسپتالاں تے وی گھٹ رقماں لگن گیاں۔ملکہ نوں نری معافیاں ہی نہیں منگنیاں چاہیدیاں سگوں ایس بارے تحقیقاں وی ہونی لوڑی دیاں نیں۔ملکہ نوں ایس گل تے وی معافیاں منگنیاں چاہیدیاں نیں پئی اوس سوسائٹی نوں کیہہ سنیہا دتا ہے۔جداں امیر بندہ ٹیکس بچاندا ہے تے ایس دا کوڑ اثر سکولاں، ہسپتالاں اتے ہاوسنگ جہے پراجیکٹاں تے پیندا ہے۔رقماں کوئی بچائے تے بھگتنا عوام نوں پئے؟ٹیکس بچاون والے اپنے آپ نوں بہوں سیانا سمجھدے نیں۔اوہ سانوں سب نوں چونا لارہے نیں۔ ٹیکس بچاون والے ہر ٹیکس دین والے نوں ایہہ آکھ رہے نیں کہ توں ماڑا ہیں اتے اسی تگڑے۔ایس سب نوں ہن ڈکنا ہو سی۔
ملکہ ہوراں57لکھ پاونڈ کے مین آئیس لینڈز فنڈ وچ لائے اتے 50لکھ پاونڈ برمودا وچ لائے نیں جس بارے پیراڈائیز پیپراں وچ گل کھلی۔ پاکستان دے بیوروکریٹاں، ججاں، کاروباری لوکاں، جرنیلاں، امیراں،میڈیا مالکاں،وڈے وکیلاں، سیاستداناں اتے سرمایہ داراں سنے ساری اشرافیہ اتے میڈیائی ناخداواں نوں ایہہ گل من لینی چاہیدی ہے پئی ہن ایہہ کم زیادہ نہیں چلے گا۔آف شور جنتاں چوریاں نوں قنونی روپ دین لئی بنایا ں گیاں سن اتے ہن ایس بارے پورا سچ بول دیو اتے اگے دا رستہ بناؤ۔جے ہن آف شور جنتاں خلاف امریکہ، برطانیہ وچ وی کم چکیا جا رہیا ہے تاں کل نوں ایہہ رقماں لے کے کتھے جاؤ گے؟ ایس ’’کار خیر‘‘ وچ سب ملوث نیں بھانویں اج کوئی کسے دا ناں لے یا نہ لے۔جرمی کوربن آون والے ویلے بارے گل کر دتی ہے اتے برنی سینڈرز وی تیار ہے۔جو کوربن ملکہ نوں آکھیا ہے اوہی گل پاکستانی اشرافیہ لئی وی ہے۔