امریکہ وچ پاکستان پالیسی تے مڑ جھات، دہری پالیسیاں تے آئی ایس آئی اتے مودی

لاہور (مانیٹرنگ رپورٹ)اک وار فیر پاکستان پالیسی بارے امریکی ایواناں وچ کھپ پئے رہی ہے اتے مودی دے دورے توں پہلاں تیز ہون والی کھپ کیہہ کسی پالیسی شفٹ دا لشکارا ہے؟ ایس بارے ہن امریکی میڈیا وچ وی بحثاں وادھو۔ایہہ لکھیا جا رہیا ہے کہ2002توں بعدوں پاکستان لئی30ارب ڈالر دتے گئے پر مسئلہ ہور چوڑ ہو چکیا ہے۔پاکستان دے سیکورٹی اداریاں، حقانی نیٹ ورک تے طالبان نال سانگیاں بارے وی سوال چکے جارہے نیں اتے ایس نوں دہری پالیسیاں دے پرانے الزام پاروں ویکھیا جا رہیا ہے۔کیہہ ایس سی او وچ پاکستان تے بھارت دی رلت پاروں اج امریکی کسے نہ کسی طراں بھارت نوں پچھے ہٹاون لئی ایہہ حربے آزماندے پئے نیں؟کیہہ امریکی پالیسی ایہہ ہے کہ بھارت، پاکستان، چین تے روس اک صفحہ تے نہ آون؟پاکستان وچ تے ایس بارے رل مل غور کرن دی تھاں ادارے آپسی لڑائیاں وچ رجھے نیں۔اینٹی بھات تے اینٹی چین لابیاں پاکستان وچ اک صفحہ تے آرہیاں نیں۔ کیہہ پاکستان وچ تیز ہون والی اداریاں دی آپسی لڑائی دے تانے بانے باہروں جڑے نیں؟ امریکی خارجہ کمیٹی وچ ہون والی بحثاں دی خبر آپ پڑھو جس نوں تھلے چھاپ رہے ہاں۔

واشنگٹن: امریکی سیکریٹری آف سٹیٹ ریکس ٹلرسن اعلان کیتا ہے کہ امریکہ پاکستان نوں دتی جان والی امداد دا بین الایجنسی جائزہ لے سی۔ ایہہ ریمارکس امریکی ایوان دی خارجہ امور کمیٹی دی بجٹ سنوائی دوران سامنے آئے جس نال ٹرمپ انتظامیہ دے پاکستان دے حوالے نال ارادیاں ول جھات پیندی جے۔ چیتے رہے کہ ٹرمپ انتظامیہ اقتدار وچ آون دے بعد توں ہ±ن تک پاک۔امریکہ سانگیاں بارے چپ ہی سی۔ امریکی سیکریٹری آف سٹیٹ دے اعلان تے امریکی قنون سازاں دے تبصریاں بعدوں امریکی میڈیا وچ ایہہ خیال کیتا جارہیا ہے کہ پاکستان دی امداد تے مڑ جھات دا مطلب ایہو ہے کہ گھٹ ہوندی امریکی امداد ہور گھٹ جائے سی۔ کانگریس دے دو ریپبلکن نمائندگان ڈانا روہرابچر تے ٹیڈ پو نے ذیلی کمیٹی برائے دہشت گردی، عدم پھیلاو¿ تے تجارت دی سماعت دے دوران وی ایسے طراں دے رد عمل دا اظہار کردے ہوئے مطالبہ کیتا سی کہ امریکہ پاکستان نوں ہتھیار فروخت کرنا بند کرے تے پاکستان نوں اک ’دہشت گردی دا کفیل‘ ملک قرار دے۔ ڈانا روہرابچر نے ڈاکٹر شکیل آفریدی دی قید تے پاکستانی خفیہ ایجنسی دے افغان طالبان توں مبینہ سانگیاں دے حوالے نال سیکریٹری سٹیٹ سامنے اپنا من پسند سوال چکیا کہ اسا ں پاکستان نوں ہن تک امداد کیوں دیندے رہے ہاں؟‘ دوناں ریپبلکن نمائندے اکثر وبیشتر انہاں سماعتاں دے دوران پاکستان نوں بدنام کردے رہے نیں۔ تاہم امریکی سیکریٹری سٹیٹ ولوں سامنے آن والا رد عمل وی”اونترا“ سی کیونجے اوہ اکثر ایس طراں دے سوالاں دا سدھا جواب دین توں گریز کردے نیں۔ انہاں دا کہنا سی کہ ’اسی پاکستان دے حوالے نال پالیسی دا بین الایجنسی جائزہ لے رہے ہاں تے ایہہ چند تحفظات چوں اک ہے۔ جداں کہ امریکی صدر نے پاکستان لئی امریکی فنڈنگ تے امداد بارے سوال کیتا ہے، پر ایس معاملے تے مڑ جھات بعد ہی پکا فیصلہ ہو سی‘۔ سماعت دے دوران انہاں دا کہنا سی کہ ’ت±سی لوک پاکستان دے نال امریکی سانگیاں نوں ول سمجھدے ہو تے سراہندے وی رہے ہو۔ پاکستان دے نال رل کے امریکہ نے افغانستان وچ پائیدار امن دی بحالی ورگے مسلے حل کرن دے نال انڈو پیسفک خطہ وچ استحکام وی حاصل کیتا‘۔ انہاں دا مزید کہنا سی کہ ’ریاست پاکستان دے نال امریکی سانگے بہوں پیچدار نیں پر تہاڈے خدشے وی سٹ پاون والے نہیں‘۔ ریپبلکن رکن ڈانا روہرابچر نے اپنے خیالاں دا اظہار کردے ہوئے آکھیا کہ ٹرمپ انتظامیہ ایس معاملے نوں حقیقت پسندانہ نقطہ نظر نال ویکھے گی۔ انہاں دا کہنا سی کہ جدوں ت±سی کسی ایسے شخص دے نال معاملے چلا ندے ہو جیہڑے تہاڈے نال دہری پالیسیاں تے چلدے ہون تے انہاں خلاف ایسا فیصلہ کرنا کوڑا گھٹ پین دے ورگا ہوندا ہے۔ انہاں نے مزید آکھیا کہ 'میں جیہناں وی لوکاں نوں اج تک ملیا ہاں انہاں نے پاکستان نوں ایس خطے وچ دہشت گردیاں دا کفیل ملک قرار دتا ہے'۔ ڈانا روہرابچر نے امریکہ نوں افغانستان وچ درپیش مسائل دا ذمہ وار پاکستان نوں ٹہراندے ہوئے آکھیا کہ ’جے اسی افغانستان وچ کامیاب نہیں ہوندے تے ایس دی وجہ پاکستان دی خفیہ ایجنسی آئی ایس آئی ہوئے گی‘۔ سیکریٹری سٹیٹ نے کانگریس نوں دسیا کہ امریکہ دی افغان پالیسی تے وی مڑ جھات پائی جارہی ہے۔نال ہی انہاں نے ایہہ وی چیتے کروایا کہ پاکستان دے بغیر کم نہیں کیتا جا سکدا۔ ٹیڈ پو نے ایس موقعہ تے آکھیا کہ پاکستان امریکہ دے نال کھیڈ رہیا ہے، امریکہ پاکستان نوں پیسہ دیندا ہے تے اوہ پیسہ آخر وچ افغانستان وچ موجود طالبان تک پہنچدا ہے جو امریکیاں نوں نقصان پہنچاندے نیں۔انہاں دا مزید کہنا سی کہ پاکستان نوں ہن امریکہ دا اک وی پیسہ نہیں ملنا چاہیدا۔ انہاں نے مطالبہ کیتا کہ ’پاکستان نوں دہشت گردی دا کفیل ملک قرار دے دینا چاہیدا تے ایس نوں اہم غیر نیٹو اتحادی دے درجہ توں وی ہٹا دینا چاہیدا ہے‘۔ انہاں نے مزید آکھیا کہ پاکستان نوں فوجی امداد دے علاوہ 50 کڑوڑ امریکی ڈالر وی سالانہ حاصل ہوندے نیں۔ ٹیڈ پو دا کہنا سی کہ اوہناں نے سیکریٹری دا بیان سنیا ہے، پر اوہ جاننا چاہندے نیں کہ 'اوہناں نے جس دا تذکرہ کیتا ہے، کیہ ایس چوں کوئی آپشن زیر غور آسکدا ہے؟'