پاک بھارت سانجھا کوڑ مائنڈ سیٹ:بھارت وچ ’’پاکستان دا یار‘‘ کانگرس۔مودی دا الزام

لاہور(مانیٹرنگ رپورٹ)ایس ہفتہ وچ بھارتی صوبے گجرات وچ چوناں جاری نیں اتے 18دسمبر تیک رزلٹ آسی۔چوناں تے پاور پالیٹکس وچ پاکستان تے بھارت وچ بھارتی ایجنٹ تے پاکستانی ایجنٹ دی آڑاں لتیاں جاندیاں نیں۔پچھلے کجھ میہنیاں وچ جداں سٹیبلشمنٹ اک ایجنڈے پاروں نوازشریف نوں ہر حال وچ کڈہنا چاہندی سی تے اپوزیشن پارٹیاں سنے بلاول بھٹو نواز نوں سرعام ’’مودی دا یار‘‘ آکھن دا ایہو گھٹیا حربہ ورتیا سی۔ایس مہم وچ نواز نال ویر پاروں اوہ پاکستانی دانشور وی رلتی سن جیہڑے پاک انڈیا دوستی دے نعرے لاندے نیں۔ہن جداں مودی نوں لوڑ پئی تے اوس نے وی اوہی کیتا جو کدی کانگرس تے بھارتی سٹیبلشمنٹ کردی سی۔’’ویری ملک‘‘ دا گھما کنج سرعام ورتیا جاندا ہے پئی ایہہ سب دے سامنے ہے۔کجھ دن پہلاں پاکستانی میڈیا وچ اک ٹھیکے پاروں امن دی آشا چلاون والے میڈیا گروپ نے نجم سیٹھی خلاف ایہو گھما ورتیا سی۔مودی کجھ زیادہ پریشان تاں مارے ہے پئی کتھے کانگرس جے اوس نوں پنجاب وانگ گجرات توں ہرا دتا تاں ساری پھوک نکل جا سی۔ایس پاروں پہلاں انہاں آکھیا پئی پاکستانی فوج دے کجھ افسر کانگرس دے احمد پٹیل نوں گجرات دا پردھان منتری بنانا چاہندے نیں۔ جداں چھ دسمبر نوں کانگرس دی ہک لیڈر اتے پاک انڈیا امن دے سیوک مانی شنکر ایار دلی وچ پاکستان تے بھارت دے پردھاناں نوں کھانا دتا تے مودی ایہہ آکھیا پئی ایہہ سب گجرات دی چوناں لئی ہو رہیا سی۔ایس کھانے وچ بھارت دے سابقہ آرمی چیف ہی رلتی نہ سن سگوں سابقی سیکٹری خارجی سنے بہوں سارے اجہے بھارتی سفیر وی سن جنہاں پاکستان وچ ڈیوٹیاں دتیاں سن۔پاکستان ولوں ایس اکٹھ وچ تحریک انصاف دے لیڈر اتے مشرفی دور وچ وزیر خارجہ رہن والے خورشید قصوری رلتی سن۔پچھلے دناں نواز خلاف مودی دا یار والا گھما ورتن وچ تحریک انصاف وی اگے اگے سی۔کانگرس ولوں جواب آیا ہے پئی مودی اوس نوں غدار آکھ کے بھارتی قوم پرستی دا مذاق آپ اڈایا ہے۔ایس ڈنر وچ سابقہ بھارتی خارجہ وزیر نٹور سنگھ، سابقہ بھارتی آرمی چیف دیپک کپور،سابقہ سفیر سلمان حیدر،شنکر واجپائی،راگوان،شرت شبروال ہی نہیں سگوں سابقہ وزیراعظم من موہن سنگھ اتے سابقہ بھارتی نائب صدر حامد انصاری سنے کڈے ہی پردھان بھارتی رلتی سن۔ ہن ایہہ سب غداراں اتے پاکستانی ایجنٹاں دی لسٹ وچ رلتی ہو چکے نیں کیونجے گجرات دی چوناں وچ 14دسمبر نوں مڑ ووٹ پینے نیں۔پاکستان وچ وی ترے واروزیراعظم بنن والے لیڈر نوں سٹیبلشمنٹ تے اوس دے نال اپوزیشن نے کجھ میہینے پہلاں بھارت ایجنٹ آکھن پاروں مودی دے یار دا گھما چلایا سی۔ایس توں پتہ چلدا ہے ساڈا سانجھا مائنڈ سیٹ کیہہ ہے؟ امن دی آشا دی مدد کرن والے پاکستانی پردھان چینل نوں کنج سرعام بھاری ایجنٹ آکھوایا گیا سی اتے پنڈاں تے محلیاں وچ کیبل آپریٹراں راہیں اوس نوں بند کرن دی مہماں چلیاں سن۔ دو پاسے دی سٹیبلشمنٹاں نوں ویری ملک دا گھما بہوں پسند ہے پر جداں لبرل، سیکولر تے امن دے حامی وی اپنے مفاداں لئی ایسے گھمے نوں جاری رکھن تاں گل گواچ جاندی ہے اتے اساں پاکستان تے بھارت وچ اجیہی گواچی کہانی نوں ہی لکھ رہے ہاں۔