لاہور (شفق ڈیسک) پانامہ لیکس پر تحریک انصاف کی مشکلات کم نہ ہوئیں، نئے وکیل بابراعوان کی تقرری کے معاملے پر بھی اندرونی تحفظات سامنے آ گئے۔ ذرائع کیمطابق تحریک انصاف کے کئی رہنماؤں نے پانامہ لیکس پر بابر اعوان کی بطور وکیل تقرری پر تحفظات کا اظہار کیا ہے۔ پارٹی کے کئی رہنما بابر اعوان کی تقرری کے حامی نہیں ہیں اور عمران خان کو تحفظات سے آگاہ کرنے کا فیصلہ کر لیا ہے۔ سینئر پارٹی رہنما کیمطابق وطن واپسی پر عمران خان سے باضابطہ بات کی جائے گی اور انہیں بتایا جائے گا کہ بابر اعوان بڑے کیس کیلئے م
وزوں نہیں ہیں، ان کی بجائے اس کیس کیلئے کسی اور کو وکیل بنایا جائے۔ واضح رہے کہ اس سے قبل بھی پاکستان تحریک انصاف (پی ٹی آئی)کی قیادت کی جانب سے ترک صدر طیب اردگان کے پارلیمنٹ کے مشترکہ اجلاس سے خطاب کے بائیکاٹ کے فیصلے پر پی ٹی آئی کے کئی ارکان اسمبلی ناراض ہوگئے تھے۔ پی ٹی آئی کے کئی سینیٹرز اور ارکان قومی اسمبلی نے شکوہ کیا کہ اس معاملے پر پارٹی قیادت نے انہیں اعتماد میں نہیں لیا۔ انہوں نے اس بات پر برہمی کا اظہار کیا کہ اہم فیصلے میڈیا اسٹریٹجی کمیٹی کر رہی ہے جسے سپریم کورٹ میں پاناما کیس کی سماعت کے حوالے سے پارٹی کا موقف تیار کرنے کیلئے اور پاناما کے معاملے پر وزراء کے بیانات کا جواب دینے کیلئے قائم کیا گیا تھا۔
