” ﭘﺮﻭﯾﻦ ﺷﺎﮐﺮ ﮐﯽ ﻣُﺮﺩﮦ ﺍﻧﮕﻠﯿﺎﮞ “

2019 ,نومبر 24



ﭘﺮﻭﯾﻦ ﺷﺎﮐﺮ ﺳﮯ ﻣﯿﺮﯼ ﺩﻭﺳﺘﯽ ﯾﺎ ﻗﺮﺑﺖ ﻧﮧ ﺗﮭﯽ۔ ﮐﺒﮭﯽ ﮐﺴﯽ ﺍﺩﺑﯽ ﻣﺤﻔﻞ ﯾﺎ ﺩﻋﻮﺕ ﻣﯿﮟ ﺁﻣﻨﺎ ﺳﺎﻣﻨﺎ ﮬﻮ ﺟﺎﺗﺎ ﺗﻮ ﻭﮦ ﻣﺎﺗﮭﮯ ﭘﺮ ﮬﺎﺗﮫ ﺭﮐﮫ ﮐﺮ ﺳﻼﻡ ﻣﯿﮟ ﭘﮩﻞ ﮐﺮﺗﯽ ، ﮐﯿﺎ ﻟﮑﮫ ﺭﮬﮯ ﮬﯿﮟ ، ﮐﯿﺎ ﭘﮍﮪ ﺭﮬﮯ ﮬﯿﮟ ﺍﻭﺭ ﮐﺒﮭﯽ ﮐﺒﮭﺎﺭ ﺍﺩﺏ ﮐﮯ ﺣﻮﺍﻟﮯ ﺳﮯ ﮐﻮﺋﯽ ﺍﯾﮏ ﺁﺩﮪ ﺧﻂ۔۔
’’ ﺧﻮﺷﺒﻮ ‘‘ ﺳﮯ ﺍُﺱ ﮐﯽ ﺷﮩﺮﺕ ﮐﺎ ﺁﻏﺎﺯ ﮬﻮﺍ ﺟﺴﮯ ’’ ﺍﻟﺘﺤﺮﯾﺮ ‘‘ ﮐﮯ ﺧﺎﻟﺪ ﺳﯿﻒ ﺍﻟﻠﮧ ﻧﮯ ﺍﺣﻤﺪ ﻧﺪﯾﻢ ﻗﺎﺳﻤﯽ ﮐﮯ ﮐﮩﻨﮯ ﭘﺮ ﺷﺎﺋﻊ ﮐﯿﺎ ﺍﻭﺭ ﯾﮧ ﺍﯾﮏ ﻋﺠﯿﺐ ﺍﺗﻔﺎﻕ ﺗﮭﺎ ﮐﮧ ﺍﺱ ﺍﺷﺎﻋﺘﯽ ﺍﺩﺍﺭﮮ ﻧﮯ ﺍﭘﻨﮯ ﺁﻏﺎﺯ ﻣﯿﮟ ﺟﺘﻨﯽ ﺑﮭﯽ ﮐﺘﺎﺑﯿﮟ ﻧﺌﯽ ﯾﺎ ﭘﺮﺍﻧﯽ ﺷﺎﺋﻊ ﮐﯿﮟ ﻭﮦ ﺳﺐ ﺑﮯ ﺣﺪ ﻣﻘﺒﻮﻝ ﮬﻮﺋﯿﮟ۔ ﻣﯿﺮﺯﺍ ﺍﺩﯾﺐ ﮐﮯ ’’ ﺻﺤﺮﺍ ﻧﻮﺭﺩ ﮐﮯ ﺧﻄﻮﻁ ‘‘ ، ﻣﻤﺘﺎﺯ ﻣﻔﺘﯽ ﮐﯽ ’’ ﻟﺒﯿﮏ ‘‘ ، ﻣﯿﺮﮮ ﺩﻭ ﺳﻔﺮ ﻧﺎﻣﮯ ’’ ﻧﮑﻠﮯ ﺗﺮﯼ ﺗﻼﺵ ﻣﯿﮟ ‘‘ ﺍﻭﺭ ’’ ﺍُﻧﺪﻟﺲ ﻣﯿﮟ ﺍﺟﻨﺒﯽ ‘‘ ﺍﻭﺭ ﭘﺮﻭﯾﻦ ﺷﺎﮐﺮ ﮐﯽ ’’ ﺧﻮﺷﺒﻮ ‘‘ ۔
ﺍﺳﻼﻡ ﺁﺑﺎﺩ ﮐﮯ ﻗﺒﺮﺳﺘﺎﻥ ﻣﯿﮟ ﭘﺮﻭﯾﻦ ﮐﻮ ﺭﺧﺼﺖ ﮐﺮﻧﮯ ﻭﺍﻟﮯ ﺑﮩﺖ ﮐﻢ ﻟﻮﮒ ﺗﮭﮯ، ﺍُﺱ ﮐﯽ ﻋﺰﯾﺰ ﺩﺍﺭﯼ ﮐﺮﺍﭼﯽ ﻣﯿﮟ ﺗﮭﯽ ﺍﻭﺭ ﻭﮬﺎﮞ ﺳﮯ ﯾﮩﺎﮞ ﺁﺝ ﮬﯽ ﮐﮯ ﺩﻥ ﭘﮩﻨﭽﻨﺎ ﻣﺸﮑﻞ ﺗﮭﺎ ، ﮐﭽﮫ ﺍﺩﯾﺐ ﺗﮭﮯ ﺍﻭﺭ ﺍُﺱ ﮐﮯ ﻣﺤﮑﻤﮯ ﮐﮯ ﮐﭽﮫ ﻟﻮﮒ۔ ﺁﺧﺮﯼ ﻟﻤﺤﻮﮞ ﻣﯿﮟ ﺍُﺱ ﮐﮯ ﺍﯾﮏ ﺑﮭﺎﺋﯽ ﺑﮭﯽ ﭘﮩﻨﭻ ﮔﺌﮯ۔ ﻟﯿﮑﻦ ﺍﺱ ﺳﮯ ﭘﯿﺸﺘﺮ ﯾﮩﯽ ﻣﺴﺌﻠﮧ ﺩﺭ ﭘﯿﺶ ﺗﮭﺎ ﮐﮧ ﺍُﺳﮯ ﻟﺤﺪ ﻣﯿﮟ ﮐﻮﻥ ﺍﺗﺎﺭﮮ ﮔﺎ ﮐﯿﻮﻧﮑﮧ ﮐﻮﺋﯽ ﻧﺎﻣﺤﺮﻡ ﺍﯾﺴﺎ ﻧﮩﯿﮟ ﮐﺮ ﺳﮑﺘﺎ۔ ﮬﻢ ﭼﺎﺭ ﭘﺎﻧﭻ ﻟﻮﮒ ﻗﺒﺮ ﮐﯽ ﻣﭩﯽ ﮐﮯ ﮈﮬﯿﺮ ﭘﺮ ﮐﮭﮍﮮ ﺗﮭﮯ ﺍﻭﺭ ﻣﯿﺮﮮ ﺑﺮﺍﺑﺮ ﻣﯿﮟ ﺍﻓﺘﺨﺎﺭ ﻋﺎﺭﻑ ﺍﭘﻨﮯ ﺁﭖ ﮐﻮ ﺑﻤﺸﮑﻞ ﺳﻨﺒﮭﺎﻟﺘﮯ ﺗﮭﮯ۔
ﺟﻨﺎﺯﮦ ﺗﻮ ﮬﻮ ﭼﮑﺎ ﺗﮭﺎ ﺟﻮ ﺍﮨﻞ ﺗﺸﻌﯿﻊ ﮐﮯ ﻋﻘﯿﺪﮮ ﮐﯽ ﻧﻤﺎﺋﻨﺪﮔﯽ ﮐﺮﺗﺎ ﺗﮭﺎ۔ ﮬﻢ ﻧﮯ ﮐﭽﮫ ﺩﯾﺮ ﺍﻧﺘﻈﺎﺭ ﮐﯿﺎ ﺍﻭﺭ ﺍﺱ ﺍُﻟﺠﮭﻦ ﮐﺎ ﺷﮑﺎﺭ ﺭﮬﮯ ﮐﮧ ﺍﮔﺮ ﺍُﻥ ﮐﺎ ﮐﻮﺋﯽ ﻧﺰﺩﯾﮑﯽ ﻋﺰﯾﺰ ﺑﺮﻭﻗﺖ ﻧﮧ ﭘﮩﻨﭽﺎ ﺗﻮ ﭘﺮﻭﯾﻦ ﮐﻮ ﻟﺤﺪ ﻣﯿﮟ ﮐﯿﺴﮯ ﺍﺗﺎﺭﺍ ﺟﺎﺋﮯ ﮔﺎ؟؟ ۔ﻣﺠﮭﮯ ﻣﮑﻤﻞ ﺗﻔﺼﯿﻞ ﺗﻮ ﯾﺎﺩ ﻧﮩﯿﮟ ﺭﮬﯽ ﮐﮧ ﺍﺱ ﮐﮯ ﺑﮭﺎﺋﯽ ﮐﺐ ﭘﮩﻨﭽﮯ ﻟﯿﮑﻦ ﯾﮧ ﯾﺎﺩ ﮬﮯ ﮐﮧ ﮐﺴﯽ ﻧﮯ ﺳﻔﯿﺪ ﮐﻔﻦ ﻣﯿﮟ ﻟﭙﭩﯽ ﭘﺮﻭﯾﻦ ﺷﺎﮐﺮ ﮐﻮ ﺍﻓﺘﺨﺎﺭ ﻋﺎﺭﻑ ﮐﮯ ﺑﮍﮬﮯ ﮬﻮﺋﮯ ﮬﺎﺗﮭﻮﮞ ﻣﯿﮟ ﺩﮮ ﺩﯾﺎ۔
ﺍﻓﺘﺨﺎﺭ ﺍُﺳﮯ ﺗﮭﺎﻣﮯ ﮬﻮﺋﮯ ﻗﺒﺮ ﻣﯿﮟ ﺍﺗﺮﻧﮯ ﮐﻮ ﺗﮭﮯ ﮐﮧ ﯾﮑﺪﻡ ﺍُﻥ ﮐﺎ ﺭﻧﮓ ﺯﺭﺩ ﭘﮍ ﮔﯿﺎ، ﮬﺎﺗﮫ ﻟﺮﺯﻧﮯ ﻟﮕﮯ۔ ﺷﺎﯾﺪ ﺍﻧﮩﯿﮟ ﺍﻧﺠﺎﺋﻨﺎ ﮐﺎ ﺩﺭﺩ ﺷﺮﻭﻉ ﮬﻮ ﮔﯿﺎ ﺗﮭﺎ۔ ﺍﻧﮩﻮﮞ ﻧﮯ ﯾﮑﺪﻡ ﻣﺠﮫ ﺳﮯ ﮐﮩﺎ ’’ ﺗﺎﺭﮌ ، ﭘﺮﻭﯾﻦ ﮐﻮ ﺳﻨﺒﮭﺎﻝ ﻟﻮ۔ ﻣﯿﮟ ﻧﮯ ﺑﺎﺯﻭ ﻭﺍ ﮐﯿﮯ ﺍﻭﺭ ﭘﺮﻭﯾﻦ ﮐﮯ ﺟﺴﺪ ﺧﺎﮐﯽ ﮐﻮ ﺗﮭﺎﻡ ﻟﯿﺎ۔
ﺍﻭﺭ ﺗﺐ ﻣﯿﮟ ﺯﻧﺪﮔﯽ ﮐﮯ ﺍﯾﮏ ﻧﺎﻗﺎﺑﻞ ﺑﯿﺎﻥ ﺗﺠﺮﺑﮯ ﺳﮯ ﺩﻭ ﭼﺎﺭ ﮬُﻮﺍ ﺟﺲ ﮐﮯ ﺑﺎﺭﮮ ﻣﯿﮟ ﺍﺏ ﺑﮭﯽ ﺳﻮﭼﺘﺎ ﮬُﻮﮞ ﺗﻮ ﺳﻨﺎﭨﮯ ﻣﯿﮟ ﺁﺟﺎﺗﺎ ﮬُﻮﮞ۔ ﭘﺮﻭﯾﻦ ﺩﮬﺎﻥ ﭘﺎﻥ ﺳﯽ ﻟﮍﮐﯽ ﺗﮭﯽ ، ﻣﻮﺕ ﮐﮯ ﺑﺎﻭﺟﻮﺩ ﻭﮦ ﺑﮩﺖ ﺑﮭﺎﺭﯼ ﻧﮧ ﺗﮭﯽ۔ ﻣﯿﮟ ﺟﺎﻥ ﺑُﻮﺟﮫ ﮐﺮ ﺍُﺱ ﺟﺎﻧﺐ ﻧﮧ ﺩﯾﮑﮭﺘﺎ ﺗﮭﺎ ﺟﺪﮬﺮ ﺍُﺱ ﮐﺎ ﭼﮩﺮﮦ ﮐﻔﻦ ﻣﯿﮟ ﺑﻨﺪﮬﺎ ﺗﮭﺎ ﺍﻭﺭ ﭘﮭﺮ ﻣﯿﮟ ﻧﮯ ﻣﺤﺴﻮﺱ ﮐﯿﺎ ﮐﮧ ﻣﯿﺮﮮ ﺩﺍﺋﯿﮟ ﮬﺎﺗﮫ ﮐﯽ ﺍُﻧﮕﻠﯿﺎﮞ ﮐﻔﻦ ﻣﯿﮟ ﺭﻭﭘﻮﺵ ﭘﺮﻭﯾﻦ ﮐﯽ ﻣﺮﺩﮦ ﺍُﻧﮕﻠﯿﻮﮞ ﭘﺮ ﮬﯿﮟ۔ ﺍُﻧﮩﯿﮟ ﭼﮭﻮ ﺭﮬﯽ ﮬﯿﮟ۔ ﺍﻧﮩﯿﮟ ﺗﮭﺎﻡ ﺭﮐﮭﺎ ﮬﮯ۔ ﻣﯿﮟ ﺍُﻥ ﮐﯽ ﺑﻨﺎﻭﭦ ﻣﺤﺴﻮﺱ ﮐﺮ ﺭﮬﺎ ﺗﮭﺎ۔
ﺍﻭﺭ ﺍُﺱ ﻟﻤﺤﮯ ﻣﺠﮭﮯ ﺧﯿﺎﻝ ﺁﯾﺎ ﮐﮧ ﯾﮧ ﭘﺮﻭﯾﻦ ﮐﺎ ﻟﮑﮭﻨﮯ ﻭﺍﻻ ﮬﺎﺗﮫ ﮬﮯ۔ ﺍﻧﮩﯽ ﺍُﻧﮕﻠﯿﻮﮞ ﺳﮯ ﺍُﺱ ﻧﮯ ﻭﮦ ﺳﺐ ﺷﻌﺮ ﻟﮑﮭﮯ ﺟﻮ ﺍﯾﮏ ﺯﻣﺎﻧﮯ ﮐﮯ ﺩﻝ ﭘﺴﻨﺪ ﮬﻮﺋﮯ، ﺍﯾﮏ ﺩﺍﺳﺘﺎﻥ ﮬﻮﺋﮯ۔ ﺍﻭﺭ ﭘﮭﺮ ﻣﺠﮭﮯ ﻭﮦ ﺷﻌﺮ ﯾﺎﺩ ﺁﯾﺎ ﺟﻮ ﺍﯾﮏ ﺧﺎﺗﻮﻥ ﻧﮯ ﻟﮑﮫ ﮐﺮ ﻣﺠﮭﮯ ﺭﺳﻮﺍ ﺍﻭﺭ ﺷﺮﻣﻨﺪﮦ ﮐﺮ ﺩﯾﺎ ﺗﮭﺎ، ﻭﮦ ﺷﻌﺮ ﺑﮭﯽ ﺗﻮ ﺍﻧﮩﯽ ﺍﻧﮕﻠﯿﻮﮞ ﻧﮯ ﻟﮑﮭﺎ ﺗﮭﺎ۔ ﺍﻭﺭ ﺁﺝ ﻣﯿﮟ ﺍﻧﮩﯿﮟ ﺑﮯ ﺟﺎﻥ ﺣﺎﻟﺖ ﻣﯿﮟ ﺍﭘﻨﯽ ﺍﻧﮕﻠﯿﻮﮞ ﺳﮯ ﺗﮭﺎﻣﮯ ﮬﻮﺋﮯ ﮬﻮﮞ۔ ﻭﮦ ﻟﻤﺤﮧ، ﻭﮦ ﮐﯿﻔﯿﺖ ﺁﺝ ﺗﮏ ﻣﯿﺮﮮ ﺑﺪﻥ ﭘﺮ ﺛﺒﺖ ﮬﮯ۔ ﻣﯿﮟ ﺁﺝ ﺑﮭﯽ ﭘﺮﻭﯾﻦ ﮐﯽ ﺍُﻧﮕﻠﯿﻮﮞ ﮐﯽ ﻣﻮﺕ ﮐﻮ ﻣﺤﺴﻮﺱ ﮐﺮﺗﺎ ﮬُﻮﮞ۔
ﺍﺱ ﺩﻭﺭﺍﻥ ﭘﺮﻭﯾﻦ ﮐﮯ ﺑﮭﺎﺋﯽ ﮐﺮﺍﭼﯽ ﺳﮯ ﺁ ﭼﮑﮯ ﺗﮭﮯ، ﻣﺠﮫ ﺳﮯ ﻟﺤﺪ ﻣﯿﮟ ﺍﺗﺮﺍ ﻧﮧ ﺟﺎﺗﺎ ﺗﮭﺎ ، ﮐﺴﯽ ﺍﻭﺭ ﺷﺨﺺ ﻧﮯ ﻣﯿﺮﯼ ﻣﺪﺩ ﮐﯽ ﺍﻭﺭ ﮬﻢ ﻧﮯ ﺍﺱ ﮐﮯ ﻣﺮﺩﮦ ﺑﺪﻥ ﮐﻮ ﻗﺒﺮ ﻣﯿﮟ ﮐﮭﮍﮮ ﺍُﺱ ﮐﮯ ﺑﮭﺎﺋﯽ ﯾﺎ ﻋﺰﯾﺰ ﮐﮯ ﺳﭙﺮﺩ ﮐﺮ ﺩﯾﺎ۔ ﯾﮧ ﻋﺠﯿﺐ ﺑﺎﺕ ﮬﮯ ﮐﮧ ﺯﻧﺪﮔﯽ ﻣﯿﮟ ﮬﻢ ﺍﯾﮏ ﺩﻭﺳﺮﮮ ﮐﻮ ﺯﯾﺎﺩﮦ ﻧﮧ ﺟﺎﻧﺘﮯ ﺗﮭﮯ، ﯾﮧ ﻣﻮﺕ ﺗﮭﯽ ﺟﻮ ﻣﺠﮭﮯ ﺍُﺱ ﮐﮯ ﻗﺮﯾﺐ ﻟﮯ ﺁﺋﯽ۔ ﻣﯿﮟ ﺁﺝ ﺑﮭﯽ ﮐﮩﯿﮟ ﭘﺮﻭﯾﻦ ﺷﺎﮐﺮ ﮐﺎ ﻧﺎﻡ ﺩﯾﮑﮭﺘﺎ ﮬﻮﮞ ﺗﻮ ﺍﺱ ﮐﯽ ﻣﻮﺕ ﮐﯽ ﮐﯿﻔﯿﺖ ﻣﺠﮫ ﭘﺮ ﻃﺎﺭﯼ ﮬﻮﻧﮯ ﻟﮕﺘﯽ ﮬﮯ۔
ﭘﺮﻭﯾﻦ ﮐﯽ ﺟﻮﺍﮞ ﺳﺎﻝ ﻣﻮﺕ ﻧﮯ ﭘﻮﺭﯼ ﺍﺩﺑﯽ ﺩﻧﯿﺎ ﮐﻮ ﺭﻧﺠﯿﺪﮦ ﮐﺮ ﺩﯾﺎ۔ ﻟﻮﮒ ﺍُﺱ ﮐﮯ ﺷﻌﺮ ﭘﮍﮬﺘﮯ، ﺍُﺱ ﮐﮯ ﻟﯿﮯ ﺭﻭﺗﮯ ﺭﮬﮯ ﺍﻭﺭ ﺍُﻥ ﻣﯿﮟ ﭘﺮﻭﯾﻦ ﻗﺎﺩﺭ ﺁﻏﺎ ﺑﮭﯽ ﺗﮭﯿﮟ ﺍُﻥ ﮐﯽ ﺳﺐ ﺳﮯ ﻋﺰﯾﺰ ﺩﻭﺳﺖ۔ ﺍﯾﮏ ” ﮔُﻮﮌﯼ ﺳﮩﯿﻠﯽ “ ﺟﻨﮩﻮﮞ ﻧﮯ ﭘﺮﻭﯾﻦ ﮐﮯ ﺍﯾﮏ ﺍﻭﺭ ﺩﻭﺳﺖ ﻣﻈﮩﺮ ﺍﻻﺳﻼﻡ ﮐﮯ ﺗﻌﺎﻭﻥ ﺳﮯ ” ﭘﺮﻭﯾﻦ ﺷﺎﮐﺮ ﭨﺮﺳﭧ “ ﻗﺎﺋﻢ ﮐﯿﺎ ﺟﺲ ﮐﮯ ﺯﯾﺮ ﺍﻧﺘﻈﺎﻡ ﮬﺮ ﺑﺮﺱ ﭘﺮﻭﯾﻦ ﺍﻭﺭ ﺍُﺱ ﮐﯽ ﺷﺎﻋﺮﯼ ﮐﮯ ﭼﺮﭼﮯ ﮬﻮﺗﮯ، ﺷﺎﻋﺮﯼ ﮐﯽ ﻧﺌﯽ ﮐﺘﺎﺑﻮﮞ ﭘﺮ ﺍﯾﻮﺍﺭﮈ ﺩﯾﮯ ﺟﺎﺗﮯ، ﮔﻠﻮﮐﺎﺭ ﺍﻭﺭ ﺷﺎﻋﺮ ﺍُﺳﮯ ﻧﺬﺭﺍﻧۂ ﻋﻘﯿﺪﺕ ﭘﯿﺶ ﮐﺮﺗﮯ۔
ﺍﻓﺴﻮﺱ ﮐﮧ ﻣﯿﮟ ﺍُﻥ ﻣﯿﮟ ﺳﮯ ﮐﺴﯽ ﻣﺤﻔﻞ ﻣﯿﮟ ﺷﺮﯾﮏ ﻧﮧ ﮬﻮ ﺳﮑﺎ ﮐﯿﻮﻧﮑﮧ ﻣﯿﮟ ﺷﺎﻋﺮ ﻧﮧ ﺗﮭﺎ ﺍﻭﺭ ﭘﮭﺮ ﭘﺮﻭﯾﻦ ﻗﺎﺩﺭ ﺁﻏﺎ ﺍﻭﺭ ﻣﻈﮩﺮ ﺍﻻﺳﻼﻡ ﻧﮯ ﻓﯿﺼﻠﮧ ﮐﯿﺎ ﮐﮧ ﺍﺱ ﺑﺮﺱ ” ﭘﺮﻭﯾﻦ ﺷﺎﮐﺮ ﺍﺭﺩﻭ ﻟﭩﺮﯾﭽﺮ ﻓﯿﺴﭩﯿﻮﻝ “ ﮐﺎ ﺍﻧﻌﻘﺎﺩ ﮐﯿﺎ ﺟﺎﺋﮯ۔ ﻣﺠﮭﮯ ﺍﻭﺭ ﻣﺴﻌﻮﺩ ﺍﺷﻌﺮ ﮐﻮ ﻓﮑﺸﻦ ﮐﯽ ﻧﻤﺎﺋﻨﺪﮔﯽ ﮐﺮﻧﮯ ﮐﮯ ﻟﯿﮯ ﺑﻼﻭﺍ ﺁ ﮔﯿﺎ۔
ﻣﯿﮟ ﮐﯿﺴﮯ ﻧﮧ ﺟﺎﺗﺎ۔ ﭘﺮﻭﯾﻦ ﮐﯽ ﻣُﺮﺩﮦ ﺍﻧﮕﻠﯿﺎﮞ ﻣﺠﮭﮯ ﺑﻼﺗﯽ ﺗﮭﯿﮟ۔
ﻣﺴﺘﻨﺼﺮ ﺣﺴﯿﻦ ﺗﺎﺭﮌ

متعلقہ خبریں