پشور وچ دیوالی (دیوے والی) منائی گئی

پشور(مانیٹرنگ رپورٹ)دیوالی اک قدیمی تہوار ہے اتے چراغاں نال جڑیا۔جین مت وچ ایہہ قدیمی دور توں منائیا جاندا سی۔ہندواں وچ ایس نال اک توں ودھو کہانیاں جڑیاں نیں پئی مختلف ہندو فرقے ایس نوں اپنے اپنے بیانیے پاروں مینیدے نیں۔جین مت والیاں وچ ایہہ مہاویر نال جڑیا تہوار ہے تے کجھ ہندو فرقیاں وچ ایہہ رام دی چودہ سال بعد واپسی نال جڑیا ہے۔ ایہو نہیں سگوں سکھاں وچ ایہہ گرو ہرگوبند ہوراں دی چغتیاں(مغلاں) توں رہائی پاروں منایا جاندا ہے۔بدھ مت والے وی ایس تہوار نوں منیندے سن۔دیوے نال ایس تہوار دا سانگا بہوں تگڑا تاں مارے ایس نوں چراغاں یعنی روشنیاں دا میلہ وی آکھدے نیں۔
خیبر پختونخوا دے صوبائی دارلحکومت پشور وچ پاکستان دے دوجے شہراں وانگ دیوالی مناہی گئی۔پشور دے نشتر ہال وچ دیوالی دے موقع تے جشن دا سماں سی۔ ہر پاسے رنگ برنگے لباس وچ ملبوس جوان، بچے تے بُڈھے انتہائی خش وکھائی دیندے سن۔ عمارت دے اندر تے باہر چراغاں سی۔ پر ایس دیوالی دی خاص گل ایہہ سی کہ ایس وچ نرے ہندو ہی نہیں سگوں مسلمان، مسیحی تے سکھ وی رلتی سن۔۔ پروگرام وچ دیوالی پاروں کیک وی کٹیا گیا۔ ایس موقع تے پاکستان کونسل آف ورلڈ ریلیجن دے رکن ارون سرب دیال نے آکھیا کہ اسی سارے اک قوم ہاں چاہے ساڈا تعلق کسی وی مذہبی جماعت یا گروہ توں ہوئے۔ ایس حوالے توں ساڈے تہوار ،ساڈے غم تے خوشیاں وی اک نیں ۔ ایس موقع تے خیبر پختونخوا تے فاٹا دے بشپ سرفراز پیٹر نے آکھیا کہ پاکستان وچ اقلیتیاں دے خلاف نفرتاں 80 دی دہائیاں وچ پروان چڑھیاں سن۔