وراثتی سیاستاں:ترین دا پتر چوناں لڑ سی۔عمرانی بیانیہ فیر گھجل؟

لاہور(مانیٹرنگ رپورٹ)نااہلیاں پاروں تحریک انصاف دے جنرل سیکڑی نوں آپدی سیٹ چھڈنی پئے گئی سی پر انہاں پارٹی نوں دس دتا ہے کہ ہن انہاں دی سیٹ تے انہاں دا پتر علی ترین چوناں لڑے گا۔پارٹی دے فیصلے توں پہلاں ہی انہاں پنجاب دی تھاں لودھراں وچ میڈیا نال گل بات کردے ایہہ اعلان کر دتا۔نااہل جہانگیر ترین آکھیا ہے میں اپنے پتر نوں پارٹی ورکراں دے آکھن تے اپنی سیٹ تے چوناں لڑن لئی تیار کیتا ہے۔ہن عمران خان نوں فیر یو ٹرن لینا پئے گا اتے پی ٹی آئی دے ہرکاریاں نوں گھجل پروگرام توں لنگھنا وی پئے سی۔عمران خان تے پی پی پی ، مسلم لیگ ۔ن سنے سب پارٹیاں نوں ایہو طعنہ دیندے سن پئی ایہہ وراثتی پارٹیاں نیں۔پر ہن اوہ اٹھ و اٹھ مارن گے۔ترین دی نا اہلیاں تے عمران آئین دے اونترے آرٹیکل وچ ترمیماں دی گل وی کر چکے نیں۔ایسے شق پاروں میاں نواز شریف نوں وی کڈہیا گیا سی۔ہو سکدا ہے کل نوں ترین دے منڈے نوں ہی سیکٹری جنرل بنا دتا جائے تے اسد عمر منہ ویکھدا ہی رہ جائے۔