کیہہ پی پی پی ہن قومی اتحاد تے آئی جے آئی بن رہی ہے؟ ایہہ کسر رہ گئی سی!

لاہور(مانیٹرنگ رپورٹ) ادلے دا بدلہ والی پالیسی اوہی ہوندی ہے جس دی کوئی باٹم لائن نہیں ہوندی جداں کہ پی پی پی دی اک باٹم لائن ہے پر لگدا ہے ہن اوہ باٹم لائن وی گواچن نوں تیار ہے۔جے آئی ٹی رپورٹ پاروں استعفی دا مطالبہ کرن دا ایہہ مطلب ہے پئی تساں جے آئی ٹی والیاں نوں سو فیصدی درست آکھ رہے ہو۔ہن جے سینیٹ جس دی عمر چند مہینے رہ گئی ہے وچ وزیراعظم دے خلاف قرارداد لیا کے پی پی پی کجھ حاصل تے نہیں کع سکے گی سگوں جمہوریت دے ویریاں ہتھ اپنی واگاں پھڑائے گی۔ایہہ مہم جوئیاں پی پی پی توں ہمش لئی قومی اتحاد تے آئی جے آئی خلاف گل کرن دا حق وی چھن لئے گی۔اک کیس عدالت وچ ہے تے پی پی پی پہلاں توں ایہہ آکھدی آئی ہے کہ ایہہ سیاسی کیس ہے تے ایس بارے عدالت دی تھاں پارلیمنٹ وچ گل ہونی چاہیدی سی۔ پر پی ٹی آئی ایس نوں عدالت وچ لے گئی۔جے آئی ٹی دے بنن بارے وی پی پی پی مایوسیاں دا رولا پایا سی پر ہن اوسے جے آئی ٹی دے فیصلے نوں چکیا جا رہیا ہے۔ایہہ مہم کامیاب ہوئے یا نہ ہوئے پر پی پی پی نوں ایس دا نقصان ضرور ہوئے گا۔اپنی نکمی پنجاب پالیسی پاروں پارٹی اگے ہی تھلے توں تھلے جارہی ہے اتے ایہہ کم ہور ودھے گا۔پی پی پی دے ویری خش کہ پارٹی نوں اک دلدل وچ پھسایا جا رہیا ہے کہ ایس توں بعد ایس دا ڈنگ مک جا سی۔2011توں2013وچکار پارٹی ایس نکمے تھیسس نال چلائی گئی سی کہ جنوبی پنجاب وچ پی پی پی نوں نسلی بنیاداں تے ووٹ لبھن گے اتے سنٹرل پنجاب وچ عمران خان پاروں سجے پکھ دے ووٹ ونڈے جان گے تے پارٹی نوں فیدہ ہوئے گا۔اوہ ایہہ گل بھل گئے کہ ملک وچ اج نہ کھبے پکھ دی سیاستاں نیں اتے نہ سجے پکھ دیاں۔پی پی پی دے پنجابی ورکربٹر بٹر ویکھدے سن تے گل ہور گروچ گئی سی۔دھرنے والیاں دا ساتھ نہ دے کے پی پی پی جیہڑا ناں وٹیا سی اج اوس نوں آپ رولدی پئی ہے۔ایہہ چلاکیاں پارٹی نوں ہور تھلے لیجاون وچ وڈا کردار ادا کرن گیاں۔