خیبر پختونخوا دی زاد پلس: مشال قتل وچ رلتی پی ٹی آئی کونسلر بینک کاک۔نواں پاکستان

خیبر بختونخوا(مانیٹرنگ رپورٹ)ویسے تے جیہڑی ویڈیوز مشال قتل کیس دی آئیاں نیں اوس وچ پلس والے وی ملزماں وچ رلتی ہو سکدے نیں پر لگدا ہے حکمران جماعت تے پلس وچ مک مکا ہو گیا ہے کہ انہاں نہ اپنے افسراں دی تفتیشاں کیتیاں تے نہ ہی حکمران پارٹی دے کونسلر نوں پھڑیچیا۔ ہن اے این پی دی لیڈر بشری گوہر ہوراں ایہہ دس دتا ہے کہ کونسلرعارف نوں پی ٹی آئی والیاں بینک کاک دوڑا دتا ہے اتے ایس وچ پی ٹی آئی دا اک ایم پی اے افتخار مشوانی رلتی ہے۔ویسے تے ہن دی تریخ تیک نہ تے وزیر اعلی مشال دے پیو نوں ملن گیا اتے نہ ہی آزاد پلس کونسلر نوں پھڑ سکی سی تے ایہہ لگدا سی کہ یا تے عمران خان دی گل انہان دی پارٹی والے منیندے ہی نہیں تے یا فیر عمران خان میڈیا نوں چکر دین لئی مشال دے گھر گئے سن۔کیہہ ایہہ نواں پاکستان ہے تے خیبر پی کے پلس ہے جس دی مثالاں خان ہوری کراچی جا کے دیندے رہے نیں۔عارف دی ویڈیو تے اگلے دن ہی آگئی سی۔پی پی پی تے اے این پی نوں گلاں بنان والے عمران خان سمجھدے نیں کہ لوک مشال نوں بھل جان گے؟۔اک جلوس، مشال قتل وچ پھڑیچے ملزماں نوں رہا کرن لئی مردان وچ ہی نکل چکیا ہے جس نوں جے یو آئی (حقانی) والیاں کڈیا ہے اتے اوس وچ سابق ڈپٹی سپیکر خیبر پی کے اگے اگے سی جو حقانی پارٹی دا بندہ ہے۔ایہہ اوہی نے جنہاں نوں تری کڑوڑ دی رقماں خٹکی سرکار دتی سی اتے عمران خان اوس نوں ڈیفنڈ کردے رہے سن۔ ایہہ مذہبی جنون دا ماملہ ہوندا تے کونسلر بینک کاک نہ دوڑدا، سگوں پیش ہو جاندا۔ ایہہ تے اک سیاسی ماملہ لگدا ہے جس وچ مذہب نوں آڑ بنایا گیا ہے۔