جج سرداررضا ہوراں الیکشن کمشنر بنن بعدوں فوری لینڈ کروزر منگوائی۔ لیڈر تحریک انصاف

لاہور(مانیٹرنگ رپورٹ)جو مسلم لیگ(ن) پانامہ ویلے آکھ ررہی سی تحریک انصاف اوس توں وی اگے ودھ گئی۔انہاں پہلے جج ہوراں دے پتراں خلاف گل کیتی سی اتے اج انہاں جج ہوراں تے وی حملہ کر دتا۔تحریک انصاف دے لیڈر فواد چوہدری آکھیا ہے پئی جج ہوراں چیف الیکشن کمشنر بنن توں بعدوں فوری عوامی خزانے نوں ورتدے ہوئے نویں لینڈ کروزر آڈر کیتی سی۔انہاں آکھیا پئی عمران خان کڑوڑاں ووٹ لتے پر الیکشن کمشنر انہاں دے وارنٹ کڈ کے عمران دی توہین کیتی۔فواد ہوراں ترین تے عمران دے سپریم کورٹ چلدے مقدمے تے وی سخت تنقیداں کردے ہوئے دسیا جے اینج دی تلاشیاں دا رواج بن گیا تے اسمبلیاں خالی ہوجان گیاں۔26اکتوبر دے نیڑے آون نال پی ٹی آئی آپدا کم ہور خراب کر رہی ہے۔اک پاسے عمران خان ایہہ آکھ دتا ہے پئی اوہ پیش ہو جان گے پر نال نال انہاں فواد توں ججاں خلاف گلاں وی کروا دتیاں۔جج رضا ہوراں دا شمار انہاں ججاں وچ جنہاں مشرف نوں دوجی وار صدر بنن خلاف آون والی پٹیشن نوں سنن دے حق وچ سن اتے ایس وچ انہاں دے نال جج شاکر اللہ جان تے بھگوان داس رلتی سن۔پر چھ ججاں مشرف نوں ریلیف دتا سی۔انہاں وچ جاوید اقبال، ڈوگر،فلک شیر،جاوید بٹر،فقیر محمد کھوکھر تے نواز عباسی ہوری رلتی سن۔