ایران، ترکی، سعودی عرب،افغانستان تے مڈل ایسٹ وچ اج پہلا روزہ۔پاکستان وچ فیردواعلان

ویسے تے ساڈا میڈیا نرا سعودی عرب وچ روزے دی خبر دیندا ہے پر انٹر نیٹ پاروں پتہ چل جاندا ہے کہ اج کتھے کتھے روزہ ہے۔پاکستان، بھارت ، بنگلہ دیش وچ ایتوار نوں پہلا روزہ ہو سی۔پرپشور وچ قاسم خان مسیت دے خطیب مفتی شہاب الدین پوپلزئی نوں اک وار فیر چن نظر آگیا ہے۔دو، ترے سالاں توں تحریک انصاف دی صوبائی سرکار ایس مسیت نوں قابو کیتا ہویا سی پر ہن چوناں پاروں اینج جاپدا ہے پئی پوپلزئی مڑ پرانا کم شروع کر دتا ہے۔پوپلزئی ہوراں آکھیا ہے کہ پہلا روزہ اج ہے۔

انہاں دا دعوی ہے کہ ایہ فیصلہ جس اجلاس وچ ہویا اوس وچ سرکاری زونل کمیٹی دے دو ممبراں وی رلت کیتی۔ مفتی شہاب الدین پاپولزئی اوس اکٹھ دے پردھان سن۔ اجلاس وچ 13 گواہاں دی روشنی وچ اج پہلا روزہ رکھن دا علان کیتا گیا۔اجیہا کوئی وی اعلان سانوں سعودی عرب، ایران، ترکی وچ نظر نہیں آندا کہ سب ریاست دے اعلان نوں منیندے نیں۔مشال دے قاتلاں توں پوپلزئی تیک ریاست وچ ریاست بناون والیاں دی گنتری وادھو اتے اجہے لوکاں نوں چکن والا میڈیا ہشیار۔