آزاد کشمیر(مانیٹرنگ رپورٹ) 25 سالہ حاملہ زنانی، اک بچے دی ماں وی ہے اتے اوس نوں آزاد کشمیر دی تھاں” جہلم وادی“ وچ مقامی پردھاناں ریپ دا نشانہ بنایا۔ اوس دا آکھنا ہے پئی ملزمان دا تعلق اک دوجے قبیلہ توں ہے۔ پلس دا خیال ہے پئی ملزم ایس زنانی نوں زیادتی لئی اک تھاں ”چکر“ لے گئے سن۔ چکر اک پہاڑی پر فضائ مقام ہے جیہڑا مظفر آباد دے جنوب مغرب وچ ضلع جہلم وادی وچ ہے۔ مظفر آباد کول کھیتر پنڈ دی رہن والی ایہہ زنانی اپنی وڈی بہن نوں ملن پنڈ کلری گئی سی۔ واپسی تے اک جیپ وچ آندے راجہ نیر اپنے یاراں سمیت اوس نوں زبردستی چک لتا۔ اوس دی بہن تے بھڑوےئے نوں وی انہاں ماریا۔ اوس نوں نیڑے دے جنگل وچ لیجاکے اوس نال جنسی زیادتیاں کیتیاں گیاں۔ زنانی نے خلیفہ شیخ زیدالنہیان ہسپتال وچ میڈیا نال گل بات کردیاں ساری گلاں کیتیاں۔ ”میں گھر آکے اپنے خصم نوں کجھ نہ دسیا اتے کجھ کھادے پیتے بغیر سوں گئی“۔ سویرے اوس اپنے خصم نوں دسیا جس آکھیا اساں بہوں ماڑے ہاں تے اوہ طاقتور اساں کجھ نہیں کرسکدے۔ ایس پاروں زنانی خود کشی دی کوشش کیتی اتے زہریلی گولیاں کھالتیاں۔ ایس پاروں اوس دے خصم تے دوجے عزیزاں اوس نوں چک تحصیل ہسپتال ہٹیاں بالا پہنچایا جتھے اوس دا علاج ہویا۔ زنانی دے اک عزیز دسیا پئی اوہ ایڈے ڈرے ہوئے سن کہ انہاں پلس وچ رپورٹ وی نہیں کروائی۔ ایہہ جمعہ دا وقوعہ سی تے ہفتے نوں اوس خودکشی دی کوشش کیتی۔ جداں میڈیا متحرک ہویا تاں پیر نوں پلس ولوں اک سب انسپکٹر وی زنانی دا بیان ریکارڈ کرلتا۔ ایس توں بعد ضلع جہلم وادی دے ڈپٹی کمشنر عبدالمجید کیانی تے ایس ایس پی ریاض حیدر بخاری وی زنانی دا حوصلہ ودھان آپ آئے۔بخاری ہوراں دسیا جے زنانی دا خصم ڈردا وی ہے تاں وی اساں ایس مقدمہ نوں ”ریاست خلاف جرم“ دے حوالہ نال رجسٹرڈ کررہے ہاں۔ ایس وچ جو وی ملوث ہے اوہ پھڑیچا جاسی۔ایہہ اک خوفناک جرم ہے۔