دشمن نہیں، ایس ملک دا حصہ ہاںenough: سعیدہ وارثی نوں کیوں آکھنا پیا؟پہلاں جرمن نژاد، سوشلسٹ ہن امیگرنٹس اتے مسلمان

لاہور (مانیٹرنگ رپورٹ)”سانوں کدوں تیک وفاداریاں دے ٹیسٹ دینے پین گے ؟“پہلے عبیدی، ہن خرم بٹ تے راشد دوان، کیہہ ایس دا مطلب ایہہ ہے کہ برطانیہ رہن والے سارے امیگرنٹس تے مسلمان دہشت گرد نیں؟ پر فیر سب نوں چوناں توں پہلاں ڈرایا کیوں جارہیا ہے؟پہلے تے برطانیہ دے ادارے دو ترے سال تفتیشاں کرن توں پہلاں کسی دا ناں وی نہیں لیندے سن پر ہن مانچسٹر دے دو گھنٹیا بعد ہی ناں سامنے آگیا سی۔ اک پاسے خرم تے راشد بارے ہلے پلس ثبوت لبھ رہی ہے پر کیوں پہلاں توں ناں دینا لوڑی دا سی؟ایہہ ات گردیاں دا اثر ہے یا فیر چونان دا؟جس طراں دیاں ٹپوسیاں برطانیہ دی ہشیار پلس تے سکارٹ لینڈ یارڈ نے الطاف حسین دے کیس وچ ماریاں سن اوہ شک ودھان لئی کافی ہے۔ اج دے برطانیہ وچ قدامت پرست اپنے نکمے ماضی تے اونتری پالیسیاں دا بھار امیگرنٹس تے مسلماناں تے اینج ہی پا رہے نیں جنج پہلی وڈی لام ویلے 1914بعدوں چرچل تے اوس دے وڈکیاں نے جرمن نڑاد برطانوی شہریاں تے بھار پاندے ہوئے انہاں دے ناں تیک بدل دتے سن۔اپنی غلطیاں نوں دوجیاں تے پانا اشرافیہ دا پرانا وطیرہ ہے کہ پہلے جرمناں تے الزام لائے،فیر سوشلسٹاں دی واری آئی اتے اج کل امیگرنٹس تے مسلمان۔ہور تے ہور ٹرمپ وی ہشیار بن کے صادق خان ول توپاں دا رخ کر دتا۔ سعیدہ وارثی دا بیان پڑھ کے بھارتی مسلمان یاد آگئے جیہڑے ہر دن اپنی وفاداریاں یاد کرواندے رہندے نیں۔ایہہ تنزلیاں کسے وی سوسائٹی لئی وڈی خرابیاں دی جڑ جے۔ ہن تساں سعیدہ وارثی دا بیان پڑھو جس نوں بی بی سی تے جنگ نے چھاپیا ہے۔
کنزرویٹو پارٹی دی سابق چیئرپرسن تے برطانوی کابینہ دی پہلی سابق مسلمان خاتون وزیر سعیدہ وارثی دا آکھنا ہے کہ کسی شخص دے بنیاد پرست بنن دی مختلف وجہاں وچوں اک وجہ خارجہ پالیسی دے خلاف ردعمل وی ہے۔ انہاں نے آکھیا کہ برطانوی مسلمان اندر دے دشمن نہیں سگوں ایس ملک دا حصہ نیں۔ پچھلے دیہاڑ لندن بریج تے ہون والے دہشت گرد حملے توں کجھ ہی دیر پہلے بی بی سی اردو نوں دتے گئے خصوصی انٹرویو وچ سعیدہ وارثی توں جداں ایہہ پچھا گیا کہ ت±سی مسلماناں بارے اپنی ہی حکومت دی کجھ پالیسیاں توں متفق نہیں سی اوہ کیہڑیاں پالیسیاں نیں؟ ایس سوال دا جواب دیندے ہوئے سعیدہ وارثی دا آکھنا سی کہ جس دی وجہ توں اوہ کابینہ توں مستعفی ہوئی سی اوہ غزہ تے فلسطین دے معاملے تے انہاں دی حکومت دا موقف سی۔ انہاں دے بقول اوہ جس وقت برطانوی وزارت خارجہ وچ اقوام متحدہ تے انسانی حقاں دی وزیر سن، ایس وقت انہاں نوں ایہہ نظرآ رہیا سی کہ ایس معاملے تے حکومت دے قول وفعل وچ تضاد ہے۔ 'جداں ایہہ لگے کہ اسی کہندے کجھ ہور ہاں تے کردے کچھ ہور تے میں سوچیا کہ ایس طراں دے فیصلے وچ مینوں حصہ نہیں لینا چاہیدا۔‘سعیدہ وارثی دے بقول انہاں دی حکومت دی انسداد دہشت گردی پالیسی وچ’پروینٹ‘ دی حکمت عملی صحیح نہیں۔ سعیدہ وارثی دا آکھنا سی کہ چاہے اوہ لیبر دی حکومت سی یا فیر ساڈی اپنی پارٹی دی، موجودہ حکومت مسلماناں بارے پالیسیاں وچ مسلماناں نوں انگیج نہیں کر دے۔انہاں دا آکھنا سی کہ جے اسی مسلماناں نوں سمجھنا چاہندے ہاں تے انہاں نوں ایہہ باور کروانا لوڑی دا ہے کہ اوہ ایس ملک دا حصہ نیں تے حکومت نوں صحیح طریقے توں مسلماناں دے نال رابطہ کرنا پئے گا۔’30 لکھ مسلماناں دے نال 20۔25 لوکاں دے ذریعے اینگیج کرنا، اینگیج منٹ نہیں ہوندی۔' برطانوی مسلماناں تے لکھی گئی اپنی کتاب 'دی اینیمی ود اِن، ٹیل آف برٹش مسلمز' بارے وچ گل کردے ہوئے وارثی دا آکھنا سی کہ انہاں نے 'اینیمی ود ان' یا گھر دے دشمن دا ٹائٹل ایس لئی استعمال کیتا سی کیونکہ جداں اوہ کابینہ دی وزیر سی تے سجے بازو دے کمنٹیٹر نے کالم وچ لکھیا کہ 'ایہہ کس طراں ہو سکدا ہے کہ اسی دہشت گردی خلاف جنگ لڑیے جداں کابینہ دے اجلاس وچ اندر دی دشمن وارثی بیٹھی ہوئی ہے۔‘ انہاں دا آکھنا سی کہ ایس طراں دے طعنے دا جواب ایہو سی کہ میں ایس نوں کتاب دا ٹائٹل بنا کے اپنی کتاب وچ ایہہ ثابت کر سکاں کہ 'مسلمان اندر دا دشمن نہیں تے ایہہ گل نان سنس ہے۔'انہاں دا آکھنا سی 'جداں میرے دادا تے نانا نے ایس ملک لئی پسینہ بہایا ہے، تے اوہناں نے خود اعلیٰ سطح تے کابینہ وچ خدمات دتیاں نیں، تے میں پچھدی ہاں کہ کدوں تک مسلماناں نوں وفاداری دے ٹیسٹ دینے پین گے۔ Enough،کافی ہو گیا۔'سعیدہ وارثی دے بقول 'اسی اندر دے دشمن نہیں، ایس ملک دا حصہ ہاں'