پاکستان ات گرد گروپاں خلاف پالیسی بدلے ورنہ اساں اپنی پاکستان بارے پالیسی بدلاں گے۔ مکین دی وارننگ

لاہور (مانیٹرنگ رپورٹ)کیہہ پاکستان تے سعودی امریکی اتحاد وچ رلن پاروں دبا ودھ رہیا ہے؟ پاکستان وچ تے انہاں نوں ہر تھاں جی آیا نوں آکھیا گیا اتے فوٹو سیشن وی کیتے پر مکین دے بیان توں ایہہ جاپدا ہے پئی سب اک صفحے تے نہیں۔ایہ گل اج ڈان دے سٹوری وچ وی ہے کہ مکین دی وارننگ واشنگٹن دے موڈ وچ تبدیلی دالشکارا ہے۔پاکستان دے خارجہ دفتر ایس دا جواب دے دتا ہے پر ایہہ سب اک تیزی نال وگڑدی صورتحال دا بوتھا ہے۔ایس ماحول وچ وزیراعظم دا دوشنبے وچ اٖفغانستان دے صدر اشرف غنی نال غیر رسمی پدر تے ملنا پاڑ نوں گھٹاون دا چنگا اشارہ جے۔ایہہ گل آکھی جا سکدی ہے کہ جس ویلے چین نے پاک افغان بد اعتمادیاں نوں مکاون لئی کردار ادا کرن دا آکھیا تے اوس توں بعدوں دھماکے شروع ہو گئے تے فیر امریکی وفد۔ہن پاکستان، چین تے افغانستان دی سانجھی کوششاں ول تیزی نال ودھنا لوڑی دا ہے۔ ہن تساں میڈیا وچ آئی خبر پڑھو کہ مکین کیہہ آکھیا ہے۔
کابل: امریکی سینیٹر جان مکین نے خبردار کیتا ہے پئی پاکستان رویہ تبدیل نہیں کردا تے ہوسکدا ہے کہ امریکہ نوں رویہ تبدیل کرنا پئے گا۔ دہشتگرداں دی جتھے بندیاں خلاف تعاون دی گل پاکستان تے واضح کردتی۔ امید ہے پاکستان حقانی نیٹ ورک تے دوجے دہشتگرداں خلاف تعاون کریگا۔ افغان میڈیا دے مطابق امریکی سینیٹر جان مکین دی سربراہی وچ امریکی سینٹ دے وفد نے پاکستان دے بعد افغانستان دا دورہ کیتا جتھے انہاں نے اشرف غنی نال ملاقات کیتی۔ افغان ٹی وی طلوع نیوز دے مطابق کانگریس دے وفد نے پاکستان وچ حقانی نیٹ ورک تے طالبان دے محفوظ ٹھکانیاں نوں ختم کرن دی ضرورت تے زور دتا تے آکھیا کہ افغانستان وچ اضافی فوجیاں دی تعنیاتی دی لوڑ سی۔ ملک وچ جاری جنگ جتن لئی فورسز نوں مزید اختیار دتے جان۔ ایس توں پہلے امریکی سینیٹر جان مکین دی سربراہی وچ امریکی سینیٹ دے وفد توں ملاقات وچ افغان صدر اشرف غنی دا کہنا سی کہ افغانستان امریکہ دی نگرانی وچ پاکستان دے نال سانجھی سرحدی کاروائیاں دی تجویز توں متفق ہے۔ امریکی سینیٹرز دے وفد نے پاکستان دے دورے وچ اعلی قیادت نال ملاقاتاں دے بعد کابل اپڑن تے افغان لیڈر شپ دے نال ملاقات کیتی۔ ملاقات دے دوران اشرف غنی دا کہنا سی افغانستان نے تجارتی تے ٹرانزٹ ہور لنکس کبھے نیں تانجے ساڈا پاکستان تے مزید انحصار نہ رہے۔ وزیرستان نوں صاف کرن دے علاوہ دوجے اہم کماں وچ وی پاکستان دے نال سرحدی علاقے وچ دہشت گرداں دی جتھے بندیاں خلاف سانجھی کاروائیاں کرن تے آمادگی ظاہر کیتی ہے۔ افغان میڈیا دی رپورٹ دے مطابق امریکی سینیٹ دی آرمڈ سروسز کمیٹی دے چیئر مین سینیٹر جان مکین دی سربراہی وچ امریکی وفد نے صدر اشرف غنی توں اڈ چیف ایگریکٹو عبداللہ عبداللہ نال وی ملاقاتاں کیتیاں۔ رپورٹ دے مطابق امریکی سینیٹراں نال گل بات کردے ہوئے صدر اشرف غنی نے آکھیا انہاں دا ملک امریکہ دی نگرانی وچ پاکستان دے نال سرحدی علاقے وچ انسداد دہشت گردی دی سانجھی کاروائیاں دی حمایت کردا ہے۔ چیف ایگزیکٹو عبداللہ عبداللہ نے امریکی وفد نال ملاقات وچ آکھیا موجودہ صورتحال وچ افغان حکومت تے عوام دے درمیان خلیج ودھ گئی ہے۔سینیٹر لنڈ توں گراہم آکھیاکہ خطے دی موجودہ صورتحال ناقابل قبول ہے اتے پاکستان اپنی پالیسی بدلے۔ رپورٹ وچ دعویٰ کیتا گیا کہ امریکی وفد نے طالبان دے نال علاقائی ملکاں دے رابطیاں تے وی تشویش طاہر کیتی۔