پنجاب: اک کروڑ 30لکھ بچے سکولاں توں باہر۔ عوامی تحریک دا دعویٰ

2017 ,اپریل 2



لاہور(مانیٹرنگ رپورٹ)پاکستان دے وڈے شہراں وچ پرائیویٹ ایجوکیشن تیزی نال پھیل چکی ہے پر ساڈے کول ایس بارے کوئی اعداد وشمار نہیں۔ نرے لہور وچ70فیصدی توں وادھو بچے سرکاری سکولاں دی تھاں پرائیوٹ سکولاں وچ جاندے نیں۔ نرے سرکاری سکولاں نوں سامنے رکھ کے”آوٹ آف سکول“ بچیاں دے حوالے نال اجہے دعوے کرنا اک فیشن بن چکیا ہے۔ پر عوامی تحریک نوں کون ڈک سکدا ہے۔ اوہ تے اجہے دعوے کرن وچ تحریک انصاف نوں وی پچھے چھڈ چکی ہے۔ اج اک وڈے انگریزی اخبار عوامی تحریک دے دعوے نوں نمایاں کرکے چھاپیا ہے۔ ایس وچ آکھیا ہے پئی پنجاب سرکار دے دعوے پاروں 64 فیصدی بچے سکولاں وچ جاندے نیں۔ پر ایس وچ پرائیویٹ سکول رلتی نہیں۔ انہاں پنجاب دے سکولاں وچ شمسی توانائیاں نال بجلی دین دے منصوبیاں دی وی مخالفتاں کیتیاں۔ ایہہ گلاں بشارت جسپال ہوراں کیتیاں نیں جیڑے عوامی تحریک نال جڑے نیں۔ انہاں آکھیا پنجاب وچ 13 فیصدی سکولاں وچ واش روم نہیں،14فیصدی وچ بجلی نہیں،6 فیصدی وچ باونڈری کند نہیں،15 فیصدی وچ صاف پانی نہیں تے 29فیصدی سکولاں کول استاداں دا گھاٹا ہے۔ انہاں ایہہ اعداد و شمار کتھوں لتے، پتہ نہیں۔ پرجے اوہ پنجاب تے باقی تنوں صوبیاں دا مقابلہ وی چھاپ دیندے تے اوہ اجہے دعوے نہ کرسکدے۔ انہاں یونیسکو دی 2016وچ چھپی جس رپورٹ دا حوالہ دتا اوس وچ وی ”آوٹ آف سکول“ بچیاں بارے گل کردے ہوئے پرائیویٹ ایجوکیشن دے ڈیٹا بارے کوئی گل نہیں کیتی گئی۔ عوامی تحریک دے بلارے نے تعلیم دے حوالے نال چوکھا کم کرن والے اسلام آبادی ادارے ”آئی سیپ“ دے ڈیٹا نوں مطلبی رنگ دتا تے چنگیاں گلاں نوں بھل گئے۔ جدتیک ساڈے کول پرائیویٹ سکولاں تے نان فارمل سکولاں دا پورا ڈیٹا نہیں ہوئے گا اوس ویلے تیک آوٹ آف سکول بچیاں بارے دعوے ہوا وچ ہی رہن گے۔ عوامی تحریک والے ایہہ گل کیوں نہیں کردے کہ اج پنجاب وچ سرکاری استاداں دی تنخواہ وادھو نیں پر کوالٹی فیر وی نہیں ہے۔ وڈا مسئلہ تے انہاں بچیاں دا ہے جیہڑے سکول جارہے نیں پر انہاں نوں تعلیم دی تھاں ”ٹوپیاں“ پہنائیاں جارہیاں نیں اتے مارکیٹ لئی ایہہ بچے نکمے دے نکمے ہی نیں۔بہوں سارے بچیاں دا سکولوں دوڑ جاون یا سکولے نہ جاون دے وڈے کارن نیں اتے انہاں وچ تعلیم دا ہنر نال نہ جڑیا ہونا تے پرائمری وچ مادری پنجابی دا ذریعہ تعلیم دی زبان نہ ہونا وڈے گھاٹے نیں۔ پر ایس بارے نہ تے ڈونراں تے انہاں دے بلاریاں سوچنا ہے اتے نہ ہی عوامی تحریک نے۔


 

متعلقہ خبریں