جعلی خط دی ایف آئی آر اساں درج کروائی۔ وزیراعظم ۔لڑائی کیبل آپریٹراں تیک؟

لاہور(مانیٹرنگ رپورٹ) ہورے کل بہوں ساری تھاواں تے جیو چینل دے بند ہون مگر ایہو جعلی خط دا بھوت سی ؟ ویسے کیبل آپریٹراں راہیں چینلاں نوں گھجل کرن دا پرانا تجربہ تے ہے۔پیرزادہ ہوری کس مار تے نیں ایس دا پتہ چل جا سی۔دھرنے دے دن مڑ لیاون والے ایہہ بھل گئے نیں پئی ایہہ2014نہیں۔سب آکھ رہے نیں پئی خط جعلی ہے , پیرزادہ ہوری دھرنا اینکر دی تعریفاں کر کے آپدا لنک دس چکے نیں۔جنج دے اینکر میڈیا دی آزادی دی آڑ وچ اساں پیدا کر چکے ہاں اوہ ایس کوڑ لڑائی دا بوتھا جے۔ شیخ رشید تے عمران خان ولوں ایس معاملے نوں جنج چکیا گیا اوہ اک ہور اشارہ ہے کہ مسلہ کتھوں شروع ہویا۔کیبل آپریٹراں ایس تے مہر لا دتی۔وزیراعظم شاہد خاقان عباسی دا کہنا ہے کہ پارلیمنٹ دے ممبراں دے کالعدم تنظیماں نال رابطے دی فہرست دے معاملے تے آئی بی نوں نہ تے کوئی خط لکھیا گیا تے نہ ہی آئی بی ولوں انہاں نوں کوئی فہرست فراہم کیتی گئی ہے۔ فہرست دے نال سامنے آن والا انٹیلی جنس بیورو دا خط جعلی ہے۔ قومی اسمبلی وچ وزیراعظم شاہد خاقان عباسی نے خود پالیسی بیان دیندے ہوئے آکھیا ہے کہ آئی بی دے خط دا معاملہ کابینہ وچ وی دسیا گیا کہ ایس خط دا حقیقت توں کوئی تعلق نہیں۔ وزیراعظم دا کہنا سی کہ انہاں نے پیمرا نوں ہدایت کردتی ہے کہ معاملے تے قنون دے مطابق کاروائی کیتی جائے تے آئی بی نوں ایف آئی آر درج کران دا کہہ دتا سی۔ انہاں دا کہنا سی کہ ایس پروپیگنڈے دے ذریعے اراکان پارلیمنٹ نوں بدنام کرن دی کوشش کیتی گئی۔ حقائق جاننا عوام دا حق ہے۔ جیہناں ممبران دے ناں جعلی فہرست وچ آئے انہاں نوں پیمرا توں تحریری شکائتاں دا آکھیا گیا ہے۔ تحریک انصاف دے پارلیمانی لیڈر شاہ محمود قریشی پٹھی منطق پاروں آکھیاکہ اپنا اک جسوسی ادارہ ہی ارکان دی جسوسی کردا رہیا ۔پارلیمنٹ دا استحقاق مجروع کیتا گیا۔ جے معاملہ کابینہ وچ حل کرلتا جاندا تے گل اگے نہ ودھدی۔ اک وزیر نے معاملہ ایوان وچ چکیا ہے۔ اک میڈیا چینل تے اینکر نوں نشانہ بنایا جارہیا ہے۔ ایس معاملے تے پوری صحافت نوں جکڑن دی کوشش کیوں کیتی جارہی ہے۔ جواب وچ وزیراعظم دا کہنا سی کہ ملتان دے ایم این اے دی تشویش نوں سمجھ سکدا ہاں۔ ایہہ پارلیمانی ممبراں دے استحقاقاں دا معاملہ ہے۔ ممبر ایس معاملے تے تحریک استحقاق پیش کرن۔ پاکستان وچ اک نجی چینل اے آر وائی تے اک فہرست وکھائی گئی سی جس وچ 37 پارلیمنٹ دے ممبراں دے کالعدم تنظیماں دے نال رابطے دسے گئے نیں۔ ایس خط تے کجھ حکومتی ارکان پارلیمنٹ نے اسمبلی اجلاس نال واک آؤٹ وی کیتا سی، جس دے بعد وزیراعظم نے انہاں ممبراں دے نال ملاقات کیتی جس وچ ایس خط دی مکمل طور تے تردید کیتی گئی سی۔ انٹیلی جنس بیورو نے ایس خط دے حوالے نال اسلام آباد وچ ایف آئی آر درج کروا دتی ہے جداں کہ نجی چینل تے ایس دے اینکر دے خلاف پیمرا وچ وی کاروائی جاری ہے۔