الطاف حسین یونیورسٹی نشتہ: سندھ سرکار ناں بدل دتا

سندھ (مانیٹرنگ رپورٹ)پاکستان دے مخالفاں دے ہتھاں وچ کھیڈن والے دے ناں تے پاکستان وچ یونیورسٹی نہیں بن سکدی۔ ایہہ بیان وزیراعلیٰ سندھ مراد علی شاہ ہوراں کابینہ اجلاس بعدوں دتا جس وچ ایس یونیورسٹی دا ناں فاطمہ جناح دے ناں نال بدلن دا فیصلہ ہویا ہے۔انہاں دسیا ہے پئی ہن ایس وچ ترمیم کیتی جائے گی۔ ایس یونیورسٹی دا نیہنہ پتھر سندھ دے سابق گورنر عشرت العباد تے رئیل اسٹیٹ کنگ ملک ریاض ہوراں جنوری 2015 وچ گنجو دے پہاڑی علاقے ”ٹکر“ وچ رکھیا سی جو حیدر آباد وچ ہے۔ اوس موقع تے الطاف حسین حیدر آباد دے لوکاں نوں یونیورسٹی بنن تے مبارکاں وی لندن توں دتیاں سن اتے ملک ریاض تے آصف زرداری دا شکریہ وی ادا کیتا سی۔ ہن اوہ کیہ آکھن گے ایس بارے سب نوں پتہ ہی ہے۔ ایس کم لئی 80 ایکڑ دی تھاں نرے 38 کڑوڑ وچ حیدر آباد ڈویلپمنٹ اتھارٹی توں خریدی گئی سی۔میڈیا ایہہ نہیں دسیا اتے پچھلے دوسالاں توں ایس یونیورسٹی دے حوالے نال کڈا کم ہوچکیا ہے؟