سموگ نال نبڑن لئی دوناں پنجاباں دے پردھان وزیراں وچ سانجھ

لاہور(مانیٹرنگ رپورٹ)دلی توں لہور تیک، پورے پنجاب دے وڈے حصے کڈے سالاں توں سموگ داشکار نیں۔کجھ حصے بھارت وچ تے کجھ پاکستانی تھاواں تے نیں۔ایس صورتحال وچ ایس سانجھے مسلے نال نبڑن لئی پاکستانی پنجاب دے وزیر اعلی میاں شہباز شریف ہوراں بھارتی پنجاب دے وزیر اعلی کیپٹن امریندر سنگھ نوں پتر لکھ دتا ہے۔پتر وچ شہباز ہوراں لکھیا ہے پئی دلی توں لہور تیک سموگ کم بہوں خراب کیتا ہے۔چولاں دی فصلاں دی بچی شیواں نوں ساڑن،فیکٹریاں تے ٹریفک دے دھوئیں اتے کنسٹرکشن پاروں سموگ وادھو۔ایس پاروں دوناں پنجاباں نوں سر جوڑ کے کم کرنا ہو سی۔لہور ہائی کورٹ دے پردھان جج وی پنجاب سرکار نوں اک کیس پاروں مسلے نال نبڑن دا آکھیا ہے۔ جج منصور علی شاہ فیصلے وچ آکھیا ہے پئی جے ائیر کوالٹی دا لیول ترے سو توں وادھو ہوئے تے ایہہ لوکاں لئی بھیڑا ہے۔جے لیول ترے سو ہوئے تے سکول، کالج، گراونڈاں سب بند کرنے چاہیدے نیں۔عدالت ایہہ وی آکھیا پئی ائیر کوالٹی لیول دی ریڈنگ ماحولیات دے محکمہ دی ویب سائٹ تے روزانہ اپ ڈیٹ ہونی چاہیدی ہے۔جے ریڈنگ ترے سو توں اتے ہوئے تے صوبے وچ میڈیکل ایمرجنسی لاون دی لوڑ ہوندی ہے۔پنجاب وچ ماحولیات دی وزیر ذکیہ شاہنواز نیں جنہاں دا پچھوکڑ میاں محمد شفیع دے خاندان نال ہے۔ وائس آف امریکہ نال گل کردے ہوئے انہاں آکھیا پئی ایہہ دوناں پنجاباں دا سانجھا مسئلہ ہے تاں مارے ایس نوں مل کے ہی حل کیتا جاسکدا ہے۔