بریگزٹ:دوجا مرحلہ، امیگریشن بارے جھیڑے اتے نپولین

لاہور(مانیٹرنگ رپورٹ)فرانس دے پردھان نپولین ہوراں نے برطانیہ والیاں نوں ہک پاسے دکانداراں دی قوم آکھیا سی اتے دوجے پاسے اوہ برطانیہ نوں یورپ دا حصہ وی نہیں منیندا سی۔ ہن بریگزٹ کروان والی برٹش اشرافیہ وی نپولین دی لاج رکھ لتی ہے۔پر بریگزٹ ایڈا اوکھا پینڈا ہوئے گا ایس بارے اندازے گھٹ سن۔پورپی یونین تے برطانیہ وچ جیہڑی گل بات ہو رہی اوس نوں یونین والے اگلے دو سالاں وچ توڑ چڑھاونا چاہندے نیں اتے برطانیہ والے اوس لمیرے بل توں پریشان نیں۔ لندن دی تے جان نکلی جا رہی ہے کیونجے لمیرے چر بعدوں لندن دی تھاں پیرس عالمی تجارتاں دا گھما بن سکدا ہے۔برطانیہ دی اشرافیہ نے آف شور جنتاں دی رقماں نوں ٹیکس توں بچاون لئی جیہڑا رستہ بریگزٹ پاروں بنایا ہے اوس پاروں برطانیہ دی مڈل کلاس ہور پھس جا سی۔ہن تساں یورپی یونین تے برطانیہ وچ ہون والی تازی گل بات بارے عالمی پریس وچ آئیاں ایہہ دو خبراں پڑھو۔
اگلے سال جیہڑاپہلا معاملہ بحثاں وچ آئے گا اوہ مارچ 2019 وچ برطانیہ دے یورپی یونین توں نکلن بعدوں تجارتاں تے سلامتیاں بارے ہون والی گل بات دا ہے۔ برطانوی وزیراعظم ٹریسا آکھیا پئی گل بات اگانہہ ودھ گئی ہے ۔ جرمنی دی چانسلر آنجیلا مرکل نے گل کھولدے ہوئے آکھیا ہے کہ ایہہ ہوراوکھا ہوندا جاسی۔ یورپین کونسل دے صدر ڈونلڈ ٹسک نے ایہہ خبر دتی کہ 27 یورپی ملکاں دے لیڈراں دی دوجے مرحلے لئی تیاریاں پوریاں جے۔ انہاں برطانیہ نوں ہور تیاریاں دا آکھیا ہے۔ اجلاس وچ امیگریشناں دا سوال وڈا جے۔ یورپی کونسل دے صدر ڈونلڈ ٹسک نے ایس دو دن دے اکٹھ وچ امیگریشناں نوں ایجنڈے وچ رکھیا سی۔ اخیر انہاں نوں آکھنا پیا پئی یورپی یونین دے راہنماواں لئی پناہ گزیناں نوں اپنے ایتھے آباد کرن دی نویں پالیسی تے سمجھوتے وچ بہوں اوکڑاں آن گئیاں۔ اندر دے بندیاں دسیاکہ یورپی یونین دے لیڈراں وچ امیگریشناں بارے گرمی سردی ہوندی رہی۔ ہالینڈ دے وزیراعظم مارک رُٹ نے وی گل بات وچ تکرار دا دسیا اتے ڈرایا وی۔ ٹسک ہوراں مکدی گل کیتی اتے آکھیا پئی اگلے سال جون تک ایس بارے حل کڈھ لو۔ یورپی ملکاں وچ امیگریشناں بارت اٹ کتے دا ویر جے۔ کوٹے دا مسئلہ سب توں اوکھا ہے۔ اٹلی تے یونان ورگے ملکاں دا جتھے پناہ دے متلاشیاں دی اک وڈی گنتری آندی ہے ایہہ آکھنا جے پئی یورپی یونین دے رکن ملک وی انہاں پناہ گیراں نوں اپنی تھاواں تے وسان۔ ہنگری پولینڈ تے جمہوریہ چیک سنے مشرقی یورپی ملک ایس دے اکا خلاف نیں۔