پاکستانی پروفیسراں تے یونیورسٹیاں لئی شرم دا مقام:روندے ہائر ایجوکیشن نوں

لاہور (مانیٹرنگ رپورٹ)مشرفی دور دا اک وڈا عذاب ہائر ایجوکیشن کہ جو عطاالرحمن ورگیاں بویا اوہ اسی ہورے کنا چر کٹاں گے۔اینکراں وانگ پروفیسراں دی تنخواہاں تگڑیاں پر علم نشتہ،وائس چانسلراں دی پنڈ وادھو، سہولتاں فائیو سٹار، آکڑ مکار اتے ہر سال نلیقاں دی پنڈ پاکستان وچ انڈیلدے نیں۔پبلک یونیورسٹیاں دا بیڑا غرق تے پرائیوٹ نری اے ٹی ایم مشیناں، سازشاں تے چاپلوسیاں وادھو، ریسرچ تے سرقہ اک بربر۔۔تاں مارے اج گورنمنٹ کالج تے پنجاب یونیورسٹی دا کوئی نام نہیں۔وڈیاں یونیورسٹیاں وچ ساڈا ناں تے نہیں پر پروفیسراں دی آکڑ تے ہے۔ ہن تسی میڈیا وچ آئی خبر آپ پڑھ لو۔اساں اوہ ملک ہاں جنہاں اک نکمے پرائمری سسٹم دی موجودگی وچ ہائر ایجوکیشن وچ سرمایہ کاریاں کیتیاں کہ جڑ خراب رہی تے اساں ٹہانیاں نوں ٹھیک کردے رہے کیونجے ایہہ اک عالمی ایجنڈا سی۔ٹونی بلئیر دی کتاب وچ اوس کوڑ لمیری رقم دا ذکر جیہڑی ایس کم تے”فارن پالیسی رشوتاں“ پاروں ونڈیاں گیاں۔

مشہور برطانوی ادارے کیوایس نے 2017/18لئی دنیا بھر دی چنگیاں یونیورسٹیاں دی لسٹ جاری کردتی۔پچھلے سال دی طراں پاکستانی یونیورسٹیاں دا ذکر کوئی ندارد،نہ تے ایشیائی ملکاں وچ ا تے نہ ہی اسلامی ملکاں وچ۔ کیو ایس 2017/18دی عالمی درجہ بندی پاروں 500بہترین یونیورسٹیاں وچ پاکستان دی صرف اک یونیورسٹی دے مقابلے وچ بھارت دی 8، چین دی 21، تائیوان دی 11، سعودی عرب دی 4، قازقستان دی4، تر کی دی5، انڈونیشیا دی 3، ملائیشیا دی 5، جنوبی کوریا دی 14یونیورسٹیاں رلتی نیں۔ درجہ بندیاں کردے ہوئے 6شئے واں نوں سامنے رکھیا گیا سی۔ انہاں وچ اکڈ یمک شہرت، ملا زمین دی شہرت، فکیلٹی دی تحقیق، طالبعلم فکیلٹی دی شرح، بین الاقوامی طلبا تے فکیلٹی دی تعدادشامل ہے۔ کیو ایس درجہ بندی دے مطابق امریکا دی 5تے برطانیہ دی 4 یونیورسٹیاں دنیا دی10 بہترین یونیورسٹیاں وچ شامل نیں۔ پاکستان دی صرف نیشنل یونیورسٹی آف سائنس اینڈ ٹیکنالوجی ( نسٹ ) دنیا دی 500یونیورسٹیاں دی فہرست وچ 431ویں پوزیشن دے نال شامل ہے۔جداں کہ قائداعظم یونیورسٹی 651۔700، لمز لہور 710۔750 دی پوزیشن تے ہے۔ یونیورسٹی آف انجینئرنگ اینڈ ٹیکنالوجی لہور، یونیورسٹی آف کراچی تے یونیورسٹی آف لہور نے 801۔1000 نے پوزیشن حاصل کیتی۔مجموعی طور تے پچھلے سال دی نسبت نسٹ تے قائداعظم یونیورسٹی اسلام آباد نے ایس سال عالمی درجہ بندی وچ اپنی پوزیشن بہتر کیتی ہے۔ جداں کی لمز 701ویں پوزیشن توں 701۔750 تے ہی ہے۔ تِن مزیدپاکستانی جامعات یو ای ٹی لہور، یونیورسٹی آف کراچی تے یونیورسٹی آف لہور701ویں پوزیشن توں ایس سال 801۔1000پوزیشن تے آگئی ہے۔چیتے رہے کہ پچھلے سال وی 800بہترین یونیورسٹیاں وچ 6پاکستانی یونیورسٹیاں شامل سن تے ایس سال 1000بہترین یونیورسٹیاں وچ وی 6ہی پاکستانی جامعات شامل نیں جیہناں چوں 4یونیورسٹیاں دی درجہ بندی وچ تنزلی ہوئی ہے۔ پچھلے سال دی گلو بل کمپیٹنس رپورٹ دے مطابق پاکستان اعلی تعلیمی میدان وچ 140چوں 124ویں نمبر تے سی۔آغا خان یونیورسٹی، نمل یونیورسٹی، اسلامی یونیورسٹی اتے نکی وڈیاں دوجی یونیورسٹیاں دا کوئی ناں ہی نہیں۔