ٹرمپ دے خلاف چار ریاستاں عدالت وچ :عدالت ٹرمپ نال رل گئی؟

لاہور(مانیٹرنگ رپورٹ)باہروں آن والیاں نال  جو کجھ امریکہ ، برطانیہ تے یورپ وچ ہو رہیا ہے اوس نال دنیا دا اک ہور کوڑ بوتھا سامنے آرہیا ہے اتے بہوں سارے امریکی، برطانوی تے یورپی ایس نوں خطرہ اتے کوڑ کم سمجھدے نیں۔ایہہ اک نویں لڑائی ہے اتے ہن سماجی، سیاسی حقاں دے راکھیاں نوں اپنے کم تے مڑ جھات پانی ہو سی۔

کیلی فورنیا تے تِن دوجی ریاستاں نے صدر ڈونلڈ ٹرمپ دی انتظامیہ دے ایس فیصلے دے خلاف پیر دے دیہاڑ اپیل دائر کیتی جس وچ ڈی اے سی اے نامی پروگرام نوں، جو خواب ویکھن والیاں دے پروگرام دے طور تے جانیاں جاندا ہے، ختم کردتا گیا ہے۔ سابق صدر براک اوبامہ نے ایہہ پروگرام انہاں نوجواناں دی راکھی لئی شروع کیتا سی جو بچپن وچ اپنے والدین دے نال غیر قنونی طور تے امریکہ وچ داخل ہوئے سن۔ ایس پروگرام وچ رجسٹریشن کران والیاں توں روزگار تے ملک بدری توں بچان دا وعدہ کیتا گیا سی۔ ڈی اے سی اے پروگرام وچ 8 لکھ توں زیادہ ں نوجواناں رجسٹر نیں۔ پروگرام دی منسوخی دے بعد انہاں دا مستقبل داء تے لگ گیا ہے۔ ہن اوہ اپنے لئی ورک پرمٹ حاصل نہیں کرسکن گے تے نہ ہی ایس دی تجدیداں کروا سکن گے۔ایہو نہیں سگوں ہن حکام انہاں نوں ملک بدر وی کرسکدے نیں۔ کیلی فورنیا دے اٹارنی جنرل ایکسوائر بیسرا نے آکھیا ہے کہ صدر ٹرمپ دے ایس حکمنامے توں بچیاں دے طور تے امریکہ وچ وڑن والے قنونی راکھے توں وانجھے گئے نیں۔ ورک پرمٹ نہ ملن توں انہاں لئی روٹی روزگار دے مسلے ودھن گے۔ کیلی فورنیا آبادی دے لحاظ توں امریکہ دی سب توں گنجان ریاست ہے جو اپنے کار ویہارلئی زیادہ تر غیر ملکی مزدوراں تے بھروسے کردی ہے۔ کیلی فورنیا دے اٹارنی جنرل دا کہنا سی کہ ڈاکا پروگرام دی منسوخی توں انہاں دی ریاست لئی اوکراں ودھن گیاں۔ وفاقی عدالت وچ ٹرمپ انتظامیہ دے خلاف دائر کیتی جان والی اپیل وچ منی سوٹا، میری لینڈ تے مین ریاستاں وی رلتی ہوگئیاں نیں۔پچھلے ہفتے 16 دوجیاں ریاستاں دے اٹارنی جنرلاں نے برکلین فیڈرل کورٹ وچ اک الگ اپیل دائر کیتی سی جس وچ ایہہ موقف اختیار کیتا گیا سی کہ صدر ٹرمپ دے فیصلے توں ایس قنونی تحفظ دی خلاف ورزی ہوئی ہے جو ڈی اے سی اے پروگرام نال جڑے نوجواناں نوں حاصل سی۔ اپیل وچ آکھیا گیا سی کہ پروگرام توں جڑے نوجوان ہن ورک پرمٹ نہ ملن توں روزگار توں وانجھے جان گے جس دے بعد انہاں دی رسائی صحت دی انشورنس تک وی ختم ہو جائے گی جو انہاں نوں ملازمت فراہم کرن والی کمپنی ولوں مہیا ہوندی ہے۔ ایس صورت حال وچ انہاں دے علاج تے طبی دیکھ بھال دے خرچیاں دا بوجھ ریاست دے موڈھیاں تے آ پئے گا۔