سعودی عرب تے اسرائیل قدرتی اتحادی نیں۔ ٹرمپ دے جوائی پردہ چک دتا

لاہور(مانیٹرنگ رپورٹ) ایہہ کسے ایرانی دا الزام نہیں، نہ ہی کسے قطری ایہہ آکھیا ہے سگوں امریکی صدر ٹرمپ دے جوائی اتے سنئیر مشیر جیراڈ کوشنر واشنگٹن وچ اک تھنک ٹینک نال گل کردے ہوئے کجھ عرب ملکاں اتے سعودی عرب بارے اوہ گلاں کر دتیاں جس نوں اج کل سعودی عرب کرپشن دے جعلی گھمے پاروں لکانا چاہندا ہے۔شام وچ سعودی پالیسی دی ناکامیاں اتے قطر دے ہتھ وچوں نکلن بعدوں سعودی عرب اتاولا ہو رہیا ہے۔نواز نال سعودی عرب دا غصہ وی ایہو ہے کہ ناں اوہ ایران مخالفتاں لئی تیار ہے اتے ناں قطر نوں فارغ کیتا ہے۔ایہہ کھیڈاں جاری اتے ہن ایس سلسلے نوں ہور ودھایا جائے گا۔کیہہ سعودی عرب بیت المقدس نوں اسرائیلی تھاں وی من لے گا؟ٹرمپ نوں خش اینج ہی کیتا جاسکدا ہے۔ایس بارے ہن ٹرمپ دے جوائی کھلے اشارے دے دتے نیں ۔اسرائیل نوں دو وطنی فارمولے تے لیاون لئی اک پاسے بیت المقدس اوس نوں دتا جا رہیا ہے اتے دوجے پاسے اسرائیل تے سعودی عرب نوں سانجھی پردھانی دین دی تیاریاں نیں۔ امریکہ دے مشہور تھنک ٹینک بروکنگز ولوں سبان فورم وچ ’’سب توں پہلاں امریکہ اتے مڈل ایسٹ‘‘ گل بات کردے ٹرمپ دے جوائی آکھیا پئی مڈل ایسٹ وچ وڈیاں تے وچلی تبدیلیاں آرہیاں نیں۔اسرائیل نوں بہوں سارے عرب ملک اتے سعودی عرب اپنا قدرتی اتحادی سمجھدے نیں۔سعودی عرب تے اسرائیل ایران تے دوجے ات گرداں نوں نکرے لا سکدے نیں۔ایجنڈا ایڈا پکا ہے پئی کوشنر ہوراں امریکہ دے خارجہ وزیر ٹیلر سن نوں لانبھے کر دے ہوئے پہلی وار آپ سامنے آ کے کھلی کھلی گلاں کر دتیاں۔سعودی عرب اک ہاری ہوئی جنگ لڑ رہیا ہے اتے اسرائیل نال سانگیاں دی گل کرن توں پہلاں انہاں جعلی احتساباں دا گھما بنایا ہے جس دا ٹیچا ایہو ہے پئی جیہڑا نویں ایجنڈے نوں نہ منے گا اوس نوں کرپشن وچ دھر لتا جائے گا۔کیہہ نوازشریف وی ایس نویں ایجنڈے دے خلاف سی؟لڑائی تیز ہو رہی ہے۔اج جداں کوشنر دا بیان وی سامنے آ چکیا ہے اتے وزیر دفاع امریکہ وی پاکستان وچ ہے تے کیہہ ایہہ سوال اوس نال کوئی چکے گا؟