نویں مذہبی پارٹی اتے دھرنے پاروں سب نوں ڈرایا جا رہیا ہے۔الجزیرہ ٹی وی گل بات

لاہور(مانیٹرنگ رپورٹ)کیہہ فیض آباد دھرنا کسے وڈے عالمی ایجنڈے دا نکا پارٹ سی؟ایس نویں پارٹی نوں پنجاب وچ مسلم لیگ(ن) نوں نکرے لاون لئی اساریا گیا ہے؟کیہہ ایہہ خیبر پختونخواہ وچ ہون والے صوفی مشال قتل کیس دا تسلسل جے؟ کیہہ پیر پرست کراچی اتے اندرون سندھ ایس نویں گھمے توں بچ سکن گے؟پرانی مذہبی جماعتاں نوں ایس کنج پریشان کیتا ہے؟کیہہ سٹیبلشمنٹ ہمیش وانگ کسے نویں عالمی ایجنڈے پاروں ایس دے مگر کھلوتی ہے؟ انہاں جیسے ہور کئی سوالاں بارے الجزیرہ ٹی وی تے ہک گل بات دا پروگرام ہویا۔ایس وچ ہور دانشوراں توں اڈ احمد رشید وی رلت کیتی۔بی بی سی تے وائس آف امریکہ تے وی فوج دے ایس معاملے وچ رلت بارے سوال وادھو۔الجزیرہ دے پروگرام دا لنک وی دے رہے ہاں۔پروگرام وچ سٹیبلشمنٹ دی لکویں سیاستاں اتے اداریاں دے ہشیار کماں بارے اشارے کیتے گئے۔ایہہ دسیا گیا پئی نواں سیاسی گھما نرا مسلم لیگ(ن) نوں پنجاب وچ نکرے لاون لئی نہیں سگوں پی ٹی آئی، ایم کیو ایم، جمیت علما اسلام، جماعت اسلامی لئی وی ہے اتے میڈیا وی ایس جنونی جنگ وچ تلیا جا رہیا ہے۔کیہہ ایس نویں گھمے نوں صوفی مشال قتل کیس دا دوجا راؤنڈ سمجھیا جائے؟ مشال کیس وچ پی ٹی آئی دو دھڑیاں وچ ونڈ کے ایس دو دھاری وار نوں بچایا سی اتے مسلم لیگ(ن) وی ایہو کر رہی ہے۔کیہہ پاکستانی سٹیبلشمنٹ مودی تے بھارت دے کامیاب تجربے پاروں پاکستانی بی جے پی بنا رہی ہے؟ جس اخیر سب نوں کھا جانا ہے؟ایران وچ تودہ پارٹی والیاں مولویاں دی حمائیتاں کر کے اپنا آپ گنوایا سی۔ معاہدہ ہون بعدوں جو کجھ جج ہوراں آکھیا ہن اوہی گلاں سب کر رہے نیں۔مسلے ہور وگڑ رہے نیں اتے سعودی اتحاد وچ پاکستان دی رلت بارے ہن پارلیمنٹ وچ گل ہونی لوڑی دی ہے۔