قائداعظم یونیورسٹی ہفتے بعد کھول دتی گئی، امتحان سر تے نیں،طلبا کونسلاں فارغ

اسلام آباد (مانیٹرنگ رپورٹ)اسلام آباد وچ قائداعظم یونیورسٹی اک ہفتے بعد کھول دتی گئی۔ یونیورسٹی وچ طلبہ کونسلاں نوں مکا دتا گیا ہے۔ سندھی تے بلوچ طلبہ گروپاں وچ جھگڑے دے بعد یونیورسٹی بند کردتی گئی سی۔ مذہب ،فرقہ تے قوم پرستیاں اتے ذاتاں دے بینراں ہیٹھ جو کاروبار ساڈے تعلیمی اداریاں وچ ہوندا ہے اوس وچ بڑے بڑے چگادری ملوث نیں۔جداں اسلحہ نکلدا ہے، دنگے ہوندے نیں تے ساریاں سیاسی جتھے بندیاں چپ رہ کے اوس دی خمش حمائیتاں کردیاں نیں۔فیر جداں مشال ورگا وقوعہ ہوندا ہے تے سب اک دوجے تے الزام لاندے نیں۔یونیورسٹی دے استاد تے انتظامیہ وی طلبا جتھے بندیاں نوں ورتدے نیں۔میڈیا وی سب جاندا ہے پر ایس دا حل کیوں نہیں کڈہیا جاندا۔جہانگیر بدر تے سعد رفیق ورگے پرانے سٹوڈنٹ لیڈر آپ ایہہ گل کر چکے نیں کہ سیاسی جماعتاں نوں تعلیمی اداریاں توں نکل آنا چاہیدا ہے فیر ایس بارے پارلیمنٹ قنون سازیاں کیوں نہیں کر دی۔ایوبی مارشلا دی وجہ توں سیاسی جماعتاں تعلیمی اداریاں وچ وڑن تے مجبور ہوئیاں سن کہ ہن جمہوری تسلسل بعدوں ایس بارے وڈے فیصلے کر لینے چاہیدے نیں کیونجے فیر اجہے نوٹیفیکیشن نہیں آون گے۔خبراں پاروں قائداعظم یونیورسٹی انتظامیہ نے طلبا کونسلاں ختم کرن دا نوٹیفیکشن جاری کردتا۔ نوٹیفیکشن دے مطابق آئندہ یونیورسٹی طلبہ دی کونسل دے ناں تے کوئی سرگرمی نہیں ہوئے گی۔جو طالب علم اپنے آپ نوں کونسل توں جڑیا دسے گا ایس نوں باہر کڈھ دتا جائے گا۔ یونیورسٹی انتظامیہ لڑائی وچ ملوث طالب علماں نوں وی یونیورسٹی توں کڈھ دتا ہے۔ اج ایس پی ڈپٹی کمشنر تے یونیورسٹی انتظامیہ رل کے آئندہ دا لائحہ عمل طے کرن گے۔حیران نہ ہونا، پرائیوٹ اداریاں وچ طلبا جتھے بندیاں بنانا غلط ہے اتے جیہڑے جمہوریت دی آڑ وچ نرے سرکاری تعلیمی اداریاں وچ طلبا جتھے بندیاں دی گل کردے نیں انہاں دے اپنے نجی تعلیمی ادارے نیں۔ کیہہ ایہہ سرکاری تعلیمی اداریاں نوں برباد تے جنی تعلیمی کاروبار نوں وادھا دین دا چکری سلسلہ تے نہیں۔ اج ایس سب بارے سب نوں ات خصوصی طور تے میڈیا نوں مڑ جھات پاون دی لوڑ۔ جے کڈہے طلبا نال کوئی زیادتی ہوئی ہے تے اوہ عدالت جاون، پر عدالت نرا سٹے دے کے ایس مسئلہ نوں لمکاون دی تھاں پورا فیصلہ کرے۔ ایہہ پلک دے مستقبل دا ماملہ ہے کہ اساں مستقبل دے معماراں نوں کوڑ کم توں بچا سکیے۔