دہشت گرد اں نال سانگے، پاکستان نوں گھاٹا ہوسی۔ امریکی خارجہ وزیر ٹلرسن

لاہور(مانیٹرنگ رپورٹ)امریکہ نے پاکستان نوں خبردار کیتا ہے کہ جے ملک دے اندر کم کردے دہشت گرد گروپاں دے نال رابطے بند نہیں ہوندے تے پاکستان اپنے علاقے دا کنٹرول گنوا بیٹھے گا کیونجے اوہ مڑ کھڑے ہو رہے نیں تے ایس دا ودا گھاٹا پاکستان نوں ہوئے گا۔(اینج جاپدا ہے اشارہ نرا حقانی نیٹ ورک ول نہیں سگوں فیض آباد ول وی ہے) امریکی وزیر خارجہ ریکسن ٹلر سن نے ایہہ گل ایسے وقت کیتی ہے جداں امریکہ تے پاکستان آپسی سانگیاں وچ وڑ چکیاں بداعتمادیاں دے معاملے وچ بہتری لیان لئی نویں سرے توں سفارتی پدر تے کوششاں کررہے نیں تانجے ہمسایہ افغانستان وچ امن نوں تگڑا کرن لئی سانجھ تلاش کیتی جائے۔ ٹلرسن نے منگل دے دن واشگٹن وچ آکھیا کہ اسی پاکستان دے نال کم کرن دے خواہاں ہاں تانجے انہاں دی سرحداں دے اندر وی دہشت گردی مک سکے۔، پر ایس لئی پاکستان نوں حقانی نیٹ ورک تے دوجے ات گرداں نال اپنے پرانے رشتے بدلن دے عمل نوں شروع کرنا ہوئے گا۔ امریکی قیادت والا فوجی اتحاد افغان قومی دفاع تے سلامتی فورسز (اے این ڈی ایس ایف) دی مدد کررہیا ہے، تاکہ فیر توں سِر چُکن والی طالبانی جھیڑیاں نوں کنٹرول کیتا جاسکے۔ حقانی نیٹ ورک دے اتحادی سرکش تے لیڈر پاکستان وچ اسارے ٹھکانیاں توں حملیاں دی منصوبہ سازیاں کردے نیں جس وچ انہاں نوں ہمسایہ ملک دے جاسوسی دے ادارے دی مدد حاصل ہے۔ ٹلرسن نے توجہ دوائی کہ پاکستان نے بہت ساری دہشت گرد تنظیماں نوں اپنے علاقیاں دے اندر محفوظ ٹھکانیاں دی اجازت دے رکھی ہے، تے ایہہ تنظیماں سائز تے اثر پاروں تگڑی ہو رہیاں نیں۔ وزیر خارجہ نے آکھیا کہ انہاں نے پاکستانی لیڈراں نوں خبردار کیتا ہے کہ ایہہ دہشت گرد گروپ کابل توں توجہ ہٹا کے اسلام آباد نوں ہدف بنان دا سوچ سکدے نیں۔ حکومت پاکستان دے اک سینئر اہل کار نے امریکی دعویاں نوں بے بنیاد کہہ کے اکا مسترد کر چھڈیا ہے۔ اہل کار نے ناں نہ دسن دی شرط تے وائس آف امریکہ نوں دسیا کہ پچھلے تِن سال دے دوران انسداد دہشت گردی دی ساڈی کاروائیاں دے نتیجے وچ پاکستانی سرزمین تے موجود دہشت گرد گروپاں دا خاتمہ ہو چکیا ہے، جداں کہ 200000 توں زائد ساڈی فوجاں افغانستان دے سرحدی علاقیاں تے ہلے تک ڈیوٹیاں دے رہیاں نیں تانجے اوہ مڑ کھڑے نہ ہو سکن۔ ٹلرسن آکھیا پئی اسی انہاں۰پاکستان) دے نال اک مثبت انداز نال کم کرن دے خواہاں ہاں۔ اسی انہاں دے نال انفارمیشن دا تبادلہ کرن لئی تیار ہاں ا تے اسی چاہندے ہاں کہ اوہ کامیاب ہون۔ پر اسی صورت حال نوں جوں دی توں رکھن دے حامی نہیں کہ جتھے دہشت گرد تنظیماں نوں پاکستان دے اندر محفوظ ٹھکانے جاری رکھن دی اجازتاں ہون۔ امریکی وزیر دفاع جم میٹس نے ایس مہینے دے اوائل وچ پاکستان دا دورہ کیتا جتھے انہاں نے پاکستانی لیڈراں تے وی زور دتا کہ اوہ ملک وچ کار فرما دہشت گرد گروپاں دے خلاف اپنی کوششاں دوگنیاں کردین۔ انہاں نے پاکستان توں ایہہ وی مطالبہ کیتا کہ افغانستان وچ امن عمل نوں تگڑا کرن دے سلسلے وچ اپنا اہم کردار ادا کرے تاکہ ایس جھیڑے نوں مکایا جاسکے۔ میٹس دے دورے دے بعد اسلام آباد وچ تقریر کردے ہوئے وزیر خارجہ آصف ہوراں نے آکھیاسی پئی دہشت گردی دے خلاف لڑائی وچ انہاں دے ملک نے مثالی قربانیاں دتیاں نیں۔ جداں کہ افغانستان حکومت تے طالبان دے مابین امن گل بات نوں چالو کرن دے حوالے توں پاکستان اپنا زور لا رہیا ہت۔ آصف دے بقول افغانستان وچ امن ساڈے لئی بہوں اہمیتاں رکھداہے۔