نیو یارک (شفق ڈیسک) ڈونلڈ ٹرمپ پر جنسی حملے کا الزام لگانیوالی خواتین میں ایک اور کا اضافہ ہو گیا جبکہ ری پبلکن صدارتی امیدوار نے کہا کہ الیکشن کے بعد وہ ایسی تمام خواتین پر ہرجانے کا مقدمہ کریں گے۔ انہوں نے امیگریشن پالیسی انتہائی سخت کرنیکا بھی عندیہ دیا ہے۔ ڈونلڈ ٹرمپ پر جنسی حملے کا الزام لگانے والی 12 ویں خاتون سامنے آ گئی ہے۔ غیر ملکی میڈیا کیمطابق نیویارک میں پریس کانفرنس کرتے ہوئے اداکارہ جسیکا ڈریک نے دعوی کیا کہ 2006ء میں انکی ٹرمپ سے ملاقات ہوئی تھی جس میں ٹرمپ ان کیساتھ غیر اخلاقی

انداز سے یپش آئے اور پھر فون کر کے ہوٹل کے کمرے میں بلایا۔ انکار پر دس ہزار ڈالر دینے اور اپنے نجی جہاز سے سفر کی پیشکش کی تھی۔ ڈونلڈ ٹرمپ مہم نے جسیکا ڈریک کے الزامات مسترد کر دیئے۔ تقریب سے خطاب میں ڈونلڈ ٹرمپ نے دعوی کیا کہ وہ جنسی حملوں کا الزام لگانیوالی تمام خواتین پر الیکشن کے بعد ہرجانے کا مقدمہ کرینگے۔ ٹرمپ نے کہا کہ صدر بنے تو وہ غیر قانونی امیگریشن ایکٹ ختم کر دینگے، جس سے امریکا بدری کے بعد غیر قانونی طور پر دوبارہ آنیوالوں کو سزا دی جاسکے گی۔ انہوں نے مزید کہا کہ امریکا بدر شہریوں کو واپس لینے سے انکار کرنیوالے ممالک کے باشندوں کو ویزا نہیں دینگے۔ ٹرمپ نے دونوں ایوانوں کی مدت کے متعلق بھی قانون سازی کا ارادہ ظاہر کیا۔