بیت المقدس:برٹش وزیراعظم مڑ بوڑھ ہیٹھ۔ہک پادری دی دھی دوجا پراپرٹی ڈیلر

لاہور(مانیٹرنگ رپورٹ) برطانوی وزیر اعظم ٹریسا مئے ہوراں کجھ دیہاڑے امریکی صدر نوں نخرے وکھائے اتے فیر کھوتی بوڑھ ہیٹھ آون دی خبراں وادھو۔آندے نیں پادریاں، فوجیاں تے پراپرٹی مافیا والیاں دے سانگے پرانے پئی برٹش وزیراعظم ٹریسا مئے اک وکار(پادری) دی دھی ہے اتے امریکی صدر ٹرمپ رئیل سٹیٹ دے کارویہار دا کنگ اتے امریکی فوجی طاقتاں دا زمانہ گواہ پئی ساڈے پاکستان وچ وی اینج دا رلواں گھما ہی چلدا پیا ہے جتھے پادری دی تھاں ملا ہے اتے باقی دونویں پاتر اوہی نیں۔ کجھ دن ہی ٹریسا ہوراں ٹرمپ نال ویہرن دا ڈرامہ رچایا، پہلے ٹرمپ دے ٹوئیٹر اکاوئنٹ توں مسلماناں خلاف ویڈیو مڑچالو کرن تے اتے فیر بیت المقدس بارے۔ پر اخیر کل ٹونی بلئیر دی یاد تازی کر دتی اتے ٹرمپ نوں فون کڈ ماریا۔دوجی لام وچ14۔اگست1941دے اٹلانٹک چارٹر توں برطانیہ جنج امریکہ اگے لم لیٹ ہے اوس دا حال سب جاندے نیں ۔ایہہ سب عالمی میڈیا لکھ رہیا ہے اتے پہلے وار نہیں لکھیا جا رہیا۔پیٹر کلارک توں ایلن جان کیملسن اتے لارڈ اسمے ورگے برٹش افسر ایس چاکری بارے آپ لکھ چکے نیں جس پاروں برطانیہ نوں امریکہ دی کلائنٹ سٹیٹ آکھنا اوکھا نہیں۔ہشیار برطانوی سفارتکاراں پردے پاون دی کوششاں کر رہے نیں پر اج دے عالمی پردے وچ سوشل میڈیا پاروں گھپے وادھو۔سکائے نیوز، سی این این سنے سب لکھ رہے نیں پئی سلامتی کونسل وچ امریکہ خلاف بیت المقدس دے مسئلہ تے ووٹ پاون بعدوں ٹریسا ہوری اوسے عطار کول حاضریاں بھر کے اپنا آندر پیٹا سب نوں دس چھڈیا ہے۔سرکاری پدر تے آکھیا گیا پئی اساں یمن بارے گل کیتی ہے پر پریس نوں اخیر وچ ایہہ وی دس دتا پئی مڈل ایسٹ وچ امن بارے وی کجھ گلاں ہوئیاں نیں۔ہن برٹش سفارتکاراں نوں درمیانہ رستہ کڈہن دا کم مل جا سی؟ جیہڑا اسرائیل نوں وی قبول ہوئے۔کیہہ ایہہ ٹرمپ دا نواں یو ٹرن ہو سی یا برطانیہ لئی امریکہ دی حمائیتاں دا ہشیار بہانہ؟چیتے رہے پئی جداں ٹرمپ یروشلم بارے اعلان کیتا سی تے ٹریسا ہوراں ہی نہیں سگوں یورپی یونین وی ایس دی مخالفتاں کیتیاں سن۔ٹرمپ نے ٹریسا نوں سدھیاں سنایاں وی سن۔ کیہہ برطانیہ اپنا بھار ودھان لئی ایہہ کم پایا سی اتے کل فون تے’’سودا‘‘ پکا کر لتا ہے؟