چلو ہن گرمیاں بھگتن لئی تیار ہوجاو:موسم وی بدل رہیا ہے۔کیہہ تسی وی بدلو گے؟

موسمیاتی محکمے (مانیٹرنگ رپورٹ) والیاں دسیا ہے پئی اگلے ہفتے توں گرمیاں آرہیاں نیں۔ میڈیا وچ ڈاکٹر غلام رسول ڈائریکٹر جنرل پی ایم ڈی دسیا ہے پئی 20 مارچ بعدوں درجہ حرارت ودھنا شروع ہوجائے گا۔ پہلے پنجاب تے سندھ دی بہوں تھاواں تے گرمیاں شروع ہوجاون گیاں اتے بعد وچ بلوچستان تے خیبر پی کے دی واری آئے گی۔ اپریل تیک آندے آندے بہار دا موسم مک جاسی۔ امید ہے ایس دوران کجھ تھاواں تے بارش وی ہوئیگی۔ سردیاں چھوٹی ہورئیاں نیں اتے ایس دی وجہ موسمیاتی وٹاندرا (Climate change) ہے۔ پچھلے سال کئی سالاں توں ایہہ ٹرینڈ چل رہیا ہے اتے اساں ایس نوں بربر ویکھ رہے ہاں۔ ایس سال سردیاں جنوری وچ شروع ہوکے فروری دے ادھ وچ مک گیاں۔ فروری وچ بارشاں بہوں گھٹ ہوئیاں۔ اپریل وچ ہی برفاں پھگلناں شروع ہوجاون گیاں اتے ایس نال گرمیاں دا موسم وی آجائے گا۔ سوال نرا نظر رکھن دا نہیں سگوں موسمیاتی وٹاندرے نوں سامنے رکھ کے پالیسیاں بدلن دا ہے۔ اینج جاپدا ہے پئی جداں تیک موسمیاتی وٹاندرے نوں نیشنل ایکشن پلان وچ نہیں پاواں گے ساڈے محکمے تے صوبے کجھ نہیں کرن گے۔ ایس حوالے نال ساڈی یونیورسٹیاں وچ کدوں کم ہوئے گا؟ ایہہ اک وڈا سوال ہے جس دا جواب ایچ ای سی والے وی نہیں دے سکدے۔ چلوجے گرمیاں ودھ رہیاں نیں تے گھٹ و گھٹ شمسی توانائیاں ول ہی پہلاں توں سفر شروع کر دیو۔ پر پہلے توں منصوبے بنانا ساڈا شیوا نہیں۔