لاہور(مانیٹرنگ رپورٹ)پورا سچ نہ بولن دی قسم کھادی ہے یا فیر ریاست وانگ انہاں نوں وی اپنا بیانیہ بدلن دی بہوں لوڑ ہے؟ ایس سب بار کھبے دے پرانے لیڈر اتے قوم پرست پٹھان افراسیاب خٹک دا تازہ بیان پڑھو۔پنجاب نوں گالاں کڈھ کے راضی رہن والے اجہے دانشوراں مسلہ نوں توڑ لیجاون دی تھاں کراہے کنج پاندے نیں ایہہ گل بات اوس دا وڈا ثبوت۔تساں پڑھو آپ،
ریاست ہن وی انتہا پسندی دی فیکٹریاں چلارہی جے۔
افراسیاب خٹک دا ادھا سچ
ایتھے ریاست انتہا پسند ہوگئی سی تے ایس نے معاشرے نوں ریڈیکلائز کیتا سی

۔ سوسائٹی کنج ڈی ریڈیکلائز ہوسکدی ہے جے ریاست ریڈ یکلا ئزیشن دی فیکٹریاں آپ چلاندی رہے؟جداں انہاں توں پچھیا گیا پئی ایس گل دا تہاڈے کول کیہ ثبوت ہے کہ ریاست اج وی پرانے بیانیے نوں چلا رہی ہے ؟ عوامی نیشنل پارٹی دے پردھان دا آکھنا سی جس طراں طالبان ایتھے بیٹھے نیں، بین ہو چکیاں تنظیماں جلسے جلوس کردیاں اتے انہاں دے خلاف کاروائی نہیں ہورہی۔ ظاہر ہے کوئی نہ کوئی انہاں دا سرپرست ہے۔ انہاں نے آکھیا کہ ایہہ تنظیماں دے خلاف جان بجھ کے کاروائی نہیں ہورہی تے ریاست وچ سیاسی ارادے دا گھاٹا ہے۔ایہہ گلاں کرن توں بعد خٹک ہوری آپ وی پٹری توں لتھ گئے اتے وڈا ملبہ پنجاب تے پا دتا۔پنجاب نوں گالاں کڈھ کے اپنے بیانیے نوں کراہے پان وچ ساڈے قوم پرست تے ترقی پسند بہوں تیز نیں۔ خٹک ہوراں آکھیا پئی ات گردیاں خلاف خصوصاً پنجاب وچ کاروائی نہیں ہوئی جتھے جہادی تے شدت پسندی دے نظریہ دان بیٹھے ہوئے نیں۔ذرا غور کرو، خٹک ہوری آکھ رہے نیں پئی پٹھان تے بے وقوف نیں تے پنجابیاں انہاں نوں اگے لایا ہویا ہے۔ات گرداں دے نظریہ داناں دی لسٹ بناؤ تے پتہ لگ جائے گا پئی انہاں وچ خٹک ہوراں دے بھائی بند کڈے نیں۔خٹک دے مطابق انہاں عناصر دے خلاف کاروائی نہ ہون دی وجہ ایہہ ہے کہ جے تسی پرانی افغان پالیسی چلاؤ گے تے ایس لئی تہانوں نان سٹیٹ ایکٹرز دی لوڑ رہے گی۔ایہہ وچلی گل ہے اتے ایس بارے پوری گل ہونی چاہیدی ہے۔پر خٹک ہوری اک چنگی گل کر کے مڑ پٹری توں اتر جاندے نیں۔فیر بولے پئی دوجی وجہ ایہہ ہے کہ خاص طور تے پنجاب وچ سیاسی مصلحتاں پاروں ووٹ پاکٹ برقرار رکھن لئی وی انہاں دے خلاف کاروائی توں گریز کیتا جارہیا ہے تے ایسی مقاصد لئی ملکی مفاداں نوں داؤ تے لا رہے نیں۔ہن ات گرداں تے انتہا پسنداں دے وڈے وڈے ووٹ بینک کتھے نیں؟ کتھوں انتہا پسنداں دے حامی الیکشن جت کے آندے نیں؟خٹک دی اپنی جماعت نری بھٹو دشمنی وچ کس مذہبی جماعت دے چار سیٹاں جتن والے لیڈر نوں وزیر اعلی بنویا سی جس اسلام نافذ کر دتا سی تے سیکولر نیپ تے ولی خان اوس دا ساتھ دتا سی۔
اداریاں دی غلطیاں اپنی تھاں، ریاست دا نکما تھیسس اپنی تھاں، پر خٹک ہوراں دا اپنا تھیسس وی کوڑ ہے اتے ایہہ وڈا مسلہ جے۔

خٹک ہوراں آکھیا کہ سرتاج عزیز نے پچھلے سال آن ریکارڈ آکھیا طالبان لیڈر شپ پاکستان وچ بیٹھی ہوئی ہے۔ انہاں دے بقول ایہہ تے ایہہ کوئی الزام نہیں سی سگوں حکومت دے اک ذمہ وار شخص نے گل آکھی سی۔ انہاں توں پچھیا کہ کیہ ہن وی طالبان قیادت پاکستان وچ موجود ہے تے انہاں نے آکھیا کہ ظاہر ہے ہن تک کسی نے ایس دی تردید تے نہیں کیتی۔ افراسیاب خٹک نے آکھیا کہ ملک دی خرابی وچ سویلینز نے وی کردار ادا کیتا ہے پر فوجی حکمراناں نے سب توں زیادہ قنون توڑیا ہے۔سولینز وچ اوہ اپنا ناں وی لے لیندے تاں گل پوری ہو جاندی۔
ایہہ گلاں انہاں نے پاکستان دے قیام دے 70 سال مکمل ہون دی مناسبت توں بی بی سی اردو دی خصوصی انٹرویو سیریز وژن پاکستان وچ گل بات کردے ہوئے آکھیاں۔بی بی سی تے پوری گل نہ کرن وچ تیز ہے کہ جس افغان جہاد خلاف خٹک ہوری گل کردے رہے اوس نوں کون، کون سپورٹ کردا رہیا اتے سنے بی بی سی افغان جہادیاں دی کون کون خبراں ودھا چڑہا کے چھاپدا رہیا، ایس بارے نہ تے ہشیار افراسیاب کوئی گل کیتی اتے نہ ہی بی بی سی والیاں۔