سیاسی جماعتیں فوجی عدالتوں کی مدت میں توسیع کیلئے رضا مند
تحریر: فضل حسین اعوان
| شائع فروری 24, 2017 | 10:05 صبح
اسلام آباد(مانیٹرنگ رپورٹ)سیاسی جماعتوں نے فوجی عدالتوں کی مدت میں ڈیڑھ سال کی توسیع کے لئے رضا مندی ظاہر کر دی ہے۔رپورٹ کے مطابق فوجی عدالتوں میں توسیع کے حوالے سے پارلیمانی رہنماو¿ں کا اجلاس اسپیکر قومی اسمبلی سردار ایاز صادق کی سربراہی میں ہوا جس میں پیپلز پارٹی کی جانب سے نوید قمر نے شرکت کی۔
ذرائع کا کہنا ہے کہ اجلاس میں سیاسی جماعتوں کی اکثریت نے فوجی عدالتوں کی مدت میں 3 سال کے بجائے ڈیڑھ سال کی توسیع دینے پر رضا مندی ظاہر کر دی ہے۔اپوزیشن جماعتیں فوجی عدالتوں کے
ساتھ نگراں کمیٹی کی بحالی کے مطالبے پر قائم ہیں، پیپلز پارٹی، ایم کیو ایم، تحریک انصاف اور دیگر سیاسی جماعتوں نے نگراں کمیٹی کے قیام پر زور دیا ہے۔ دوسری جانب مذہبی دہشت گردی کے الفاظ کے معاملے پر سیاسی رہنماو¿ں میں اختلافات بدستور موجود ہیں اور اس حوالے سے اسپیکر قومی اسمبلی جمعیت علمائے اسلام کے سربراہ مولانا فضل الرحمان سے ملاقات کریں گے۔سیاسی جماعتوں کی جانب سے فوجی عدالتوں کی مدت میں توسیع کی رضا مندی کے بعد مسودے کی منظوری کے لئے وفاقی وزیر قانون زاہد حامد کی سربراہی میں اجلاس جاری ہے۔ اسپیکر قومی اسمبلی نے ذیلی کمیٹی کو ہدایت کی ہے کہ پارلیمانی رہنماو¿ں کے اجلاس میں طے پانے والے نکات پر مشتمل مسودے کو حتمی شکل دی جائے۔
