لاہور(مانیٹرنگ رپورٹ)امریکہ دے خارجہ محکمہ نے تمام ملکاں نوں آکھیا جے کہ اوہ اپنے شہریاں دا، جو امریکہ جانا چاہندے نیں، تفصیلی ڈیٹا دین تانجے امریکی عہدے دار ایہہ طے کرسکن کہ انہاں شہریاں توں دہشت گردی دا تے کوئی خطرہ نہیں ہے۔ خبر رساں ادارے روئیٹرز نے جمعرات دے روز اک خط دے حوالے دسیا کہ ایہہ خط اک روز پہلے تمام امریکی سفارت خانیاں نوں گھلیا سی۔ روئیٹرز دا کہنا ہے کہ ایس خط وچ صدر ڈونلڈ ٹرمپ دے 6 مارچ دے ایگزیکٹو آرڈر دے تحت دنیا بھر دے لئی ویزیاں دی جانچ پڑتال دے طریقہ کار بارے ہدایت

اں رلتی نیں۔ صدر دے ایگزیکٹو آرڈر وچ چھ مسلم اکثریتی ملکاں دے شہریاں دی امریکہ آمد تے محدود عرصے لئی پابندی لائی گئی سی۔ ایس حکم نامے جس نوں عدالتاں وچ چیلنج کیتا گیا سی دا ٹیچا امریکہ وچ ممکنہ دہشت گرداں دا داخلہ روکنا سی۔ خط وچ انہاں تقاضیاں دا ذکر کیتا گیا ہے جیہناں تے پورا اترنا امریکہ دا سفر کرن والیاں لئی لوڑی دا ہو سی۔ انہاں وچ الیکٹرانک پاسپورٹ دا اجرا یا اجرا کرن دا منصوبہ تے انہاں پاسپورٹاں دی گمشدگی یا چوری دی صورت وچ انٹر نیشنل پلس ایجنسی انٹر پول نوں اطلاع کرنا شامل ہے۔ ایس خط وچ دنیا بھر دے ملکاں توں ایہہ وی آکھیا گیا ہے کہ اوہ ماریکہ سفر کرن والے اپنے شہریاں دی شناخت توں متعلق بائیوگراف تفصیلاں، جرماں توں جڑیا رکارڈ وی دین گے۔ جداں ایس خط دے بارے محکمہ ہوم لینڈ سیکیورٹی نال رابطہ کیتا گیا تے انہاں نے ایس تے کوئی تبصرہ نہیں کیتا۔