لاہور (مانیٹرنگ رپورٹ)راتی طلعت حسین دے پروگرام ”نیا پاکستان“ وچ پی ٹی آئی دی لیڈر اتے سیکورٹی ماہر شیریں مزاری راحیل شریف دی نویں نوکری بارے تحریک انصاف دا موقف دتا۔ہوسکدا ہے نعیم الحق دے بیان وانگ کل نوں پی ٹی آئی ایس نوں وی ”ذاتی بیان“ آکھ دے۔ شیریں مزاری کجھ دن پہلاں ایہہ بیان دتا سی کہ پی ٹی آئی والے پارلیمنٹ وچ ایس نوکری بارے سوال چکن گے پر اوہ ویلہ ہلے تک نہیں آیا۔ کیمیائی تے کروز حملیاں بعدوں ہن شام دی لڑائی اک ہور موڑ لے چکی ہے۔ شیریں مزاری آکھیا پئی اساں اک ا

جہے اتحاد دے ممبر بن چکے ہاں جس دے ٹی او آر بارے سانوں کجھ پتہ نہیں۔ پر شیریں مزاری ایہہ دسن پئی سانوں افغان جہادیا ات گردی خلاف جنگ توں پہلاں کجھ پتہ سی؟ جس خود مختاری دا شیریں مزاری نوں اج خیال آرہیا ہے اوہ تے سیٹو سینٹو دے ویلے توں گروی رکھی جاچکی سی اتے جے بھٹو مذاحمت کیتی سی تے اوس نوں عبرت ناک مثال بنادتا گیا سی۔ اتے مزاری ہوری اوس سب بیانیے دے راکھیاں وچوں اک سن۔ جداں طلعت حسین آکھیا پئی ایس اتحاد وچ ترکی سنے 38 ملکاں رلت اینج ہی کیتی ہے جنج پاکستان کیتی ہے تے ایس دا مزاری ہوراں کول کوئی جواب نہیں سی۔ ایس موقعہ تے ڈاکٹر مزاری آکھیا کہ میرے سمیت بہوں سارے سیکورٹی ماہر ایہہ سمجھدے نیں کہ ایہہ فرقہ واریت دی بنیاد تے بنایا گیا اتحاد ہے۔ طلعت حسین انہاں نوں پچھ لیندے کہ کیہ افغان جہاد تے طالبان فرقہ وارانہ الار نہیں رکھدے سن؟ جے مخالف کرنی ہے تے تحریک انصاف سارے بیانیے نوں رگیدے۔ جداں طلعت حسین آکھیا پئی ریاست دے سارے ادارے یقین دوا رہے نیں پئی ایہہ فرقہ وارانہ اتحاد نہیں نہ پاکستان کسے ملک (ایران) خلاف ایس وچ رلتی ہویا ہے۔ ایس تے سیکورٹی ماہر شیریں مزاری برجستہ آکھیا اوہ(ادارے) جو کہندے نیں، اوہ کہندے رہن... ریاست نوں تے پتہ ہی نہیں اوہ کیہ کرن جارہی ہے۔ جے ایہو بیان بے نظیر بھٹو دیندی سی تے اوہ ”سیکورٹی رسک“ آکھواندی سی۔ پر شیریں مزاری تے قدیمی سیکورٹی ماہر نیں اتے اوس نوں تے کجھ نہیں آکھیا جاسکدا۔ افغانستان توں شام تیک پھیلے مسلیاں وچ جے تساں عراق، لبیا نوں رلتی کرلو تاں سب توں وڈا مسئلہ ایہہ ہے پئی ات گردیاں نوں حکومت بدلن لئی ورتیا جاندا رہیا ہے۔ صدام تے قذافی نوں مارکے کیہ لبھیا؟ عراق دی جنگ وچ ایران پارٹنر سی اتے صدام نوں ہٹاون دے حق وچ پر حافظ الاسد یا بشار الاسددے مسئلہ تے اوہ ہور لین لیندا ہے۔ ہر کوئی ایہہ گیم کھیڈا رہیا ہے۔ برطانیہ، فرانس جو لبیا وچ کیتا اوس دے خلاف پی ٹی آئی کدی بیان وی نہیں دتا۔ جے اج مجبوری وچ شیریں مزاری ورگے سیکورٹی ماہر سعودی عرب دی مخالفت تے ایران دی حمائیت کررہے نیں تے انہاں نوں پوری گل وی کرنی ہوسی۔ فرقہ وارانہ جنگاں تے 1980 دے دہاکے توں جاری نیں اتے اساں انہاں دا آسرالے کے پاکستان وچ جمہوری سیاستداناں دی چھٹی کرواندے رہے ہاں۔ جو اج ہورہیا ہے اوہ کوئی نواں کم نہیں سگوں پرانے دا تسلسل ہے۔ اک پاسے شیری مزاری آکھدی ہے پئی سانوں ایس اتحاد بارے پتہ نہیں پر جداں راحیل شریف دی نوکری بارے گل آئی تے انہاں ایس اتحاد دی تفصیلاں دس دتیاں اتے آکھیا راحیل شریف پرائیوٹ نوکری کرن نہیں جارہے سگوں اوہ ریاست دے نمایندے نیں۔ اج پاکستان دے سیکورٹی تے دفاع بارے فکر مند ڈاکٹر صاحبہ سرد جنگ وچ بطور کھڈاری 1950 دے دہاکے توں پاکستان دی رلت بارے تے کوئی گل نہیں کردے۔ فرقہ واریت وچ سعودی عرب، ایران، صدام تے قذافی دا وادھو حصہ پر شیریں مزاری اج کل ایران بارے گل نہیں کرنا چاہندی۔ انہاں دے 1980 تے 1990 دے دہاکے دی لکھتاں ایہہ نہیں کہندیاں۔ مزاری ہوراں ایہہ وی آکھیا پئی سعودی عرب وچ موجود ساڈی فوج نوں یمن نیڑے باڈر تے لادتا گیا ہے۔ اخیر وچ انہاں آکھیا کہ ایس فیصلے نوں پارلیمنٹ وچ لے کے آنا چاہیدا سی۔ جہناں چار سال وچ پارلیمنٹ نوں نہیں منیا، ممبراں نوں گا لاں کڈہیاں انہاں نوں چور، ڈاکو آکھیا تے ہن انہاں نوں پارلیمنٹ دی تکریماں دی بہوں فکر ہوگئی۔ ”جے حکومت نوں اتحاد بارے پتہ ہی نہیں کہ اوہ کیہ ہے تاں فیر اوہ کنج این او سی دے سکدے نیں“
اینج جاپدا ہے پئی فریسٹریشن وچ پی ٹی آئی نوں کجھ سمجھ نہیں آرہیا۔ اک پاسے اوہ طالبان دا دفتر کھولن دی گل کردے نیں تے دوجے پاسے ایران دے حمائیتی بنن دا تاثر دیندے نیں۔ عمران خان کل آکھیا کہ اساں ڈالر لے کے افغان جہاد کیتا، طالبان بنائے فیر ڈالر لے کے طالبان ڈگائے۔ بندہ پچھے تسی دھرنیاں ویلے مسکرا مسکرا کے ڈالر لین والیاں دے مگر مگر سو تے چونویں وزیراعظم نوں چور آکھ کے لانا چاہندے سو۔ادھے سچ نال ہن کم نہیں چلنا۔ جے گل ایہو ہے جو تسی اج آکھ رہے ہو تے جداں آرمی چیف جنرل باجوہ نال ملن گئے سو تے ایہہ گلاں کرنیاں سن یاایہہ گلاں نریاں میڈیا لئی ہی نیں؟ پی ٹی آئی دے لیڈر لندن دے قنون تے انصاف دے دلدا دہ نیں کہ اوہ یاد نہیں رکھنا چاہندے کہ ایسے برطانیہ نے نوآبادیاتی بندوبست راہیں ساڈے ایتھے ظلم کیتے۔ سرد جنگ وچ برطانیہ امریکہ دا پحھلگ ہے پر تسی لندن دے اسیر۔ خیالات وچ ایڈا تضاد بیانیے نوں ہور کوڑ کر چھڈ دا ہے اتے پی ٹی آئی نوں اک وار بیٹھ کے اپنے تضاداں بارے فیر توں غور کرنا چاہیدا ہے۔ انہاں 2013 دی چوناں وچ تریجی حیثیت حاصل کیتی سی جو بڑا وڈا کم سی۔ پر 2013 بعدوں انہاں جو کجھ کیتا اوس پاروں اج اوہ فریسٹریشن دا شکار نیں۔ صوبہ خیبر پی کے وچ اوہ کوئی قابل ذکر کارنامہ نہیں کرسکے۔ کدی اوہ آپ مودی نوں ملن ٹر جاندے نیں تے کدی مودی مخالفت دا جامہ پالیندے نیں۔ اوہ ایہہ گل بھل رہے نیں کہ ایہہ مہاتما گاندھی دا دور نہیں سگوں انفارمیشن دا دور ہے اتے انہاں نوں اپنا بیانیہ مڑ ویکھنا چاہیدا ہے۔