لاہور(مانیٹرنگ رپورٹ) پنجاب دے وزیر اعلیٰ دعوٰی کیتا ہے پئی لہور دھماکے دا سہولت کار باجوڑ توں تعلق رکھن والا ”انوار الحق“ پھڑ یچیا گیا ہے۔ اوس دسیا ہے پئی اوہ اک ات گرد جتھے بندی ”جماعت الاحرار“ دا بندہ ہے۔ ایہہ کوئی پہلا بندہ نہیں جس نوں ات گردی وچ پھڑیچیا ہوئے اتے اوس دی اعترافی بیاناں والی ویڈیو وی چلی ہوئے۔ لوکی اوس ویلے یقین کرن گے جداں عدالت وچ فری ٹرائل بعدوں اوس نوں مجرم آکھیا جائے گا۔ نرا دہشت گردی دی عدالتاں یا فوجی عدالتاں توں سزاواں دوان نال کم نہیں چلدا۔

ساڈے ادارے اعترافی بیاناں دے حوالے نال کوئی چنگی شہرتاں نہیں رکھدے اتے اسحاق ڈار دا ”اعترافی بیان“ وی سانوں یاد ہے۔ کلبوشن یا دیو دا عدالتی مقدمہ کتھے ہے؟ ایہہ وی یاد ہے۔ لوکاں دی اک امید عدالتاں توں ہی ہے اتے جے فری ٹرائل بعدوں ایہہ ملزم، مجرم ثابت ہوندا ہے تاں ایس نال وزیر اعلیٰ دی جے جے کار وی ہوئے گی تے انہاں اداریاں دی وی جہناں ایس نوں پھڑیا ہے۔اگلے دن خبر آئی کہ اوس دا بھرا تے ہور رشتے دار وی پھڑیچے گئے نیں۔دو دن میڈیا ایس خبر نوں چلایا تے بعد وچ بھل گیا۔پلس دے رواجی طریقیاں توں جے انصاف لبھدا ہوندا تاں مسلے حل نہ ہو جاندے؟جداں جمہوری سرکاراں وی انہاں تے انحصار کردیاں نیں تاں مسئلہ ہور چوڑہو جاندا ہے۔ایس نال جمہوریت تے وی سوال اٹھدا ہے اتے ات گرداں نوں وی مدد ملدی ہے۔جرم دی ٹریل لبھن اتے عدالتاں وچ فری ٹرائل توں بغیر ایہہ مسئلہ حل نہیں ہوئے گا۔