فرانس24(مانیٹرنگ رپورٹ) ایہہ زنانی 29نومبر1899وچ جمی سی اتے کل شمالی اٹلی دی تھاں وربانیہ وچ پوری ہو گئی اتے ایس دا ناں ہے مورانو۔وربانیہ وچ نرے دو ہزار جی رہندے نیں تے وربانیہ دی مئیر سلویا ہوراں دا آکھنا ہے پئی اوہ انہاں لئی اک ماڈل سی اتے اوس نوں ہمش یاد رکھیا جائے گا۔امریکہ دے جرینٹالوجی ریسرچ گروپ والیاں دسیا ہے پئی کل تیک مورانو دا شمار دنیا دے زندہ بندیاں وچ سب توں پرانے تے وڈی عمر دے انساناں وچ سی اتے اوس توں بعدوں ہن جمیکا دی وائلٹ براو¿ن دا ناں ہے جیہڑی 10مارچ1900وچ جمی سی۔م

ورانو دا پہلا خصم پہلی وڈی لام ویلے مر گیا سی اتے اوس اپنے دوجے خصم نوں دوجی لام ویلے چھڈیا سی کیونجے اوہ بڑا لڑاکو سی۔اوس نوں اپنے دوجے خصم توں اٹلی دے قنوناں پاروں طلاق لین وچ 30سال لگے تے ایس دوران اوس دا اکلا پتر وی مر گیا۔اوس دا ناں گینیز بک آف ریکارڈ وچ رلتی کیتا گیا تے اے ایف پی والیاں پچھلے سال اوس دا انٹرویو چھاپیا۔اوس دسیا کہ وڈی عمر دی اک وجہ بیلنس خوراک ہے۔اوہ ہسپتال نہیں جاندی سی پر اک وار اوس نوں اپریشن کروانا پیا۔اوہ اخیری وقت تیک ہسدی وسدی رہی اتے اوس دی مزاح دی حس زندہ رہی۔جداں اوہ پچھلے سال اپنی 117ویں سالگرہ تے کیک کٹن لئی تیار سی تے اوس لوکاں ول ویکھ کے آکھیا،”میرے وال کنج دے لگ رہے نیں“۔جی آر جی دے رابرٹ یونگ آکھدے نیں کہ میں پچھلے ست سالاں توں مورانو دے شب و روز ویکھ رہیا ساں اتے مورانو عمر دے اخیری سالاں وچ وی زبردست سی جیہڑا آپ اک ریکارڈ ہے۔اوس دی یاداشت وی چنگی بھلی سی۔یونگ دسیا پئی ساڈی کھوج پاروں دنیا وچ سب توں زیادہ عمر جس انسان دی سی اوہ وی اک زنانی جینی کالمینٹ ہی سی جیہڑی1997وچ122سال دی عمر تیک اپڑی اتے ایہہ اک فرانسیسی زنانی سی۔ایما مورانو ایس لسٹ وچ پنجویں نمبر تے آندی ہے۔