لاہور(مانیٹرنگ رپورٹ)”میرے سفنیاں نوں یونیورسٹی توڑ بھن چھڈیا اتے اک وار وی معافی نہیں منگی۔میری عزت تے حرمت نال جیہڑا کھیلواڑ کیتا گیا اوس دا کوئی مل نہیں۔“ایہہ گل وجیہہ عروج آپ دسیاں۔ساڈے تعلیمی اداریاں وچ آئے دن اجہے وقوعے استاداں تے پڑھیاراں نال ہوندے رہندے نیں۔ایس ماملے وچ پبلک تے پرائیوٹ سب اک جہے نیں۔کینیڈا وچ رہن والی اک زنانی پنجاب یونیورسٹی خلاف مقدمہ کیتا سی۔ مقدمہ کرن ویلے عروج طالب علم سی پر اوس دی مقدمے دا فیصلہ ہن آیا ہے جداں اوہ کینیڈا جاچکی ہے اتے 38ورہیاں دی ہے۔ا

وہ 21 ورہیاں دی سی اتے پنجاب یونیورسٹی وچ انگریزی ڈیپارٹمنٹ وچ پڑھدی سی۔عروج تے یونیورسٹی والیاں کہیڑے الزام لائے سن ایس دی تفصیل تے پتہ نہیں پر ایہہ رپورٹ ہویا ہے پئی ایس پاروں عروج دی پڑھائی مک گئی اتے اوس دے خاندان والے ڈھیر پریشان ہوگئے۔اوس دا یونیورسٹی آنا وی بند ہو گیا تے اوہ خود کشی بارے وی سوچدی رہی۔ اوس نوں غلطی نال امتحان توں غیر حاضر دسیا گیا سی۔ جداں والد نے پنجاب یونیورسٹی آفس وچ ایس بارے شکایت کیتی تے افسر ادارے دی غلطی منن دی تھاں دھی تے ہی غیر اخلاقی حرکتاں دا الزام لادتا سی۔ ”میری ماں وی میرے تک شک کرن لگی سی پئی الزام ہی اجہے لائے گئے سن۔ میرے کلاس فیلو مینوں عجیب نظراں نال ویکھدے سن۔ میرے حوالے نال، الزام لگن توں بعد عجیب عجیب گلاں کرنیاں شروع کردتیاں گیاں۔ اک ایسا ویلہ وی آیا جدوں میں خودکشی بارے سوچنا شروع کردتا سی۔ فیر میرے گھر والیاں جلدی جلدی میرا ویاہ کیتا تے میں اپنے میاں نال کنیڈا ٹر آئی“۔ لہور ہائی کورٹ کوئی 17 سال بعد فیصلہ سنایا پر ہن وی یونیورسٹی کول اپیل وچ جاون دا حق ہے۔ سوال ایہہ ہے کہ آخر ادارے اپنیاں غلطیاں منن توں کیوں انکاری ہوندے نیں۔ وڈے بینک ہون یا پرائیویٹ ہسپتال، تعلیمی ادارے ہون یا غیرسرکاری ادارے ہر تھاں غلطی منن دی ریت ہی نہیں ہے۔ ایہہ کم نرا زنانیاں نال ہی نہیں سگوں بندیاں نال وی ہوندا ہے۔ کڈے ہی لوکاں نوں اجہے الزام لا کے نکرے لایا جاندا رہیا ہے۔ایہہ مقدمہ ساڈے اداریاں دا بوتھا وکھارہیا ہے کہ ایس بارے ہن تے غور کرلینا چاہیدا ہے۔عروج ہمت کیتی اتے مقدمے نوں چلاندی رہی اتے ہن میڈیا تے آکے وی گل کیتی۔