لاہور(مانیٹرنگ رپورٹ)کیہہ 28جولائی اک وار فیر آئے گی؟ایہہ سوال ہر اک دی زبان تے ہے۔ایس صورتحال پاروں ہی تے پی ٹی آئی بڑی ہشیاریاں نال نا اہل بندے نوں پارٹی صدر رکھن دی ترمیم پاس ہون دتی سی۔انہاں نوں ’’لاڈلا ‘‘سمجھ کے چھڈ دتا جاندا ہے یا نہیں ایس دا فیصلہ تے ہن نیڑے۔سٹیبلشمنٹ کیہہ سوچ رہی ہے ایس بارے چانن وی ہو جا سی۔اینج جاپدا ہے پئی26 اکتوبر خان ہوراں تے سوار ہو چکی ہے اتے اوہ ہتھ پیر مار رہے نیں۔پہلاں انہاں آکھیا سی میں رضا ہوراں اگے پیش ہواں گا پر یو ٹرن لے کے

اسلام آباد ہائی کورٹ اپڑ گئے۔دوجے پاسے اوہ نواز خلاف فیصلے وچ سپریم کورٹ دی بہوں تعریفاں کر چکے نیں تے ہن جے فیصلہ انہاں دی نااہلیاں والا وی آگیا تے اوہ کیہڑا یو ٹرن لین گے؟ عمران تے جہانگیر نااہلی کیس وچ چیف جسٹس پاکستان جسٹس ثاقب نثارہوراں آکھیا کہ 26 اکتوبر توں سارک کانفرنس لئی سر لنکا جانا ہے، ایس لئی عمران خان تے جہانگیر ترین کیس دا فیصلہ اکٹھا کراں گے۔ سپریم کورٹ وچ جہانگیر ترین نااہلی کیس دی سماعت ہوئی جس وچ جہانگیر ترین دے وکیل سکندر بشیر دلائل دیندے ہوئے سب گل کھول دتی۔گل منن توں اڈ چارہ وی نہیں سی کہ ثبوت تے سامنے سن۔ پیشی وچ چیف جسٹس پاکستان نے جہانگیر ترین دے وکیل نوں آکھیا پئی اسی جاننا چاہندے ہاں شیئرز لئی کینی رقم لائی گئی تے اللہ یار نے کیڈی رقم دے شیئر خریدے؟ وکیل سکندر بشیرنے دس دتا پئی جہانگیر ترین دے ملازماں نے 4 کڑوڑ 19 لکھ دے شیئر خریدے، 11 کڑوڑ 27 لکھ روپے وچ ویچے۔ ملازماں نوں رقم جہانگیر ترین نے فراہم کیتی سی ۔ عدالت وچ ہون والی اج دی پیشی نکی جہی سی اتے کل صبح ساڑھے یاراں وجے مڑ پیشی ہو سی۔دوجے پاسے الیکشن کمیشن وچ پیش ہون دا اعلان کرن والے کپتان عمران خان نے ناقابل ضمانت وارنٹ گرفتاری اسلام آباد ہائی کورٹ وچ چیلنج کردتے۔ الیکشن کمیشن نے توہین عدالت کیس وچ چیئرمین تحریک انصاف عمران خان دے پہلے قابل ضمانت وارنٹ جاری کیتے سن جس نوں اسلام آباد ہائی کورٹ نے معطل کردتا سی۔ بعدوں چیئرمین پی ٹی آئی دی عدم پیشی تے ناقابل ضمانت وارنٹ جاری کردے ہوئے انہاں نوں 26 اکتوبر نوں گرفتار کرکے پیش کرن دا حکم دتا گیا۔ عمران خان دی درخاست وچ آکھیاگیا کہ الیکشن کمیشن نے غیر قنونی کم وی کیتااتے اختیار توں تجاوزوی کیتا ہے۔ وارنٹ جاری کرکے بنیادی حقاں دی خلاف ورزیاں کیتیاں نیں۔ درخاست وچ آکھیا گیا کہ الیکشن کمیشن نے سیاسی بنیاد تے انتقام دا نشانہ بنایا ہے۔ چیتے رہے کہ عمران خان نے غیر ملکی فنڈنگ کیس وچ عدالت تے متعصب ہون دے الزامات لائے سن جس تے پی ٹی آئی دے باغی رکن اکبر ایس بابر نے 23 جنوری نوں انہاں دے خلاف توہین عدالت دی درخاست دائر کیتی سی۔