لاہور(مانیٹرنگ رپورٹ)صوبہ خیبر پی کے دی سرکار ہوئے یا فیر پی ٹی آئی سب ہولے ہولے فاٹا دے خیبر پی کے وچ رلن دے پراسس تے دستخط کیتے نیں۔پر ہن کیونجے چوناں نیڑے نیں تاں پٹھاناں نوں چونا لاون دی تیاریاں وادھو۔چار سال خیبر پی کے دی سرکار چلاون توں بعد اج انہاں تے انکشاف ہویا پئی فاٹا سیکریٹریٹ والے بدمعاش، کرپٹ تے چور بیوروکریٹ نیں؟کیہہ انہاں فاٹا سیکریٹریٹ وچ چنگے بندے لاون لئی کدی دھرنا دتا سی؟انہاں خیبر پی کے دے غیر پٹھاناں بارے کیوں در وٹیا ہویا ہے؟کیہہ ایس صوبے وچ گورنر غیر پٹھاناں توں بناون

دی ریت نوں مکاون دا ہشیار فیصلہ ہو چکیا ہے؟ ایس بارے کیوں عمران خان کھل کے گل نہیں کردا؟در وٹن نال شک ودھدا ہے؟پرایہہ اکلا مسلہ نہیں جس بارے سب چپ نیں۔صوفی مشال کیس بھیڑی گورنینس دی اک وڈی مثال ہے۔ کیہہ مشال خان پختون نہیں سی؟ کیہہ پی ٹی آئی دا کونسلر پھڑیچیا گیا؟صوبے دا وزیراعلی تے ہک وار وی مشال دے گھر نہیں گیا۔چھ مہینے ہو گئے پر کیس نوں لما کیتا جا رہیا ہے۔مشال دے پیو نوں کیس مردان توں شفٹ کیوں کروانا پیا؟ کیہہ خٹکی سرکار اوس دی مردان وچ راکھی نہیں کر سکدی سی؟ کیہہ مردان صوبے دا حصہ نہیں؟ مردان نوں فاٹا بناون والے اج فاٹا نوں ضم کرن دا ڈرامہ کر رہے نیں؟عوامی نیشنل پارٹی تے بھیڑی سی پر تساں کیہڑیاں ددھ دی نہراں چلائیاں نیں؟ جے پچھلے چار سالاں وچ خان ہوراں صوبے نوں اگے رکھیا ہوندا تاں اج ایہہ نہ آکھنا پیندا کہ اساں کجھ کر نہیں سکے۔شیخ رشید ورگیاں دے مگر لگ کے تساں کرسی دی کھیڈ ول رجھے رہے تاں صوبہ لئی کجھ نہ کیتا۔ہن بڑکاں مارن نال کجھ نہیں ہونا؟ اک پاسے تسی اک مدرسے نوں رقماں دیندے ہو تے اسلام آباد وچ اپنے آپ نوں لبرل آکھدے ہو پئی ایہہ میڈیا دازمانہ ہے اینج دے چکر نہیں چل سکدے؟حیران نہ ہونا، جن انگریزاں فاٹا بنایا سی اتے پٹھاناں نوں بفر زون راہیں ٹوٹیاں وچ ونڈیا، عمران انہاں خلاف تے ہک لفظ نہیں بولدا۔ہن کیونجے چوناں سر تے نیں تاں مارے فاٹا، فاٹا ہون لگی ہے۔جداں کوئی دال ونڈن دی گل کرے تے سمجھ جانا چاہیدا ہے پئی پھٹ کتھے لگ رہے نیں۔