لاہور(مانیٹرنگ رپورٹ)نویں دینی جماعتاں اتے فیض آباد دھرنے پاروں ڈرانا کسے ہور نوں سی پر ایس نویں کھیڈ توں پرانی سکہ بند دینی جماعتاں ڈر گیاں جاپدیاں نیں۔ضیا دور وچ پی پی پی نوں مکاون دا جیہڑا پراجیکٹ چلایا گیا سی اوس پاروں پی پی پی نوں تے کجھ نہ ہویا سی سگوں ایم کیو ایم تے فرقہ پرست تگڑے ہو گئے سن۔اجکل سٹیبلشمنٹ نواز مکاؤ پراجیکٹ تے کم کر رہی ہے پر ایس پاروں ایم ایم اے دی بحالیاں ہو جاون گیاں ایس بارے تے انہاں سوچیا وی نہیں سی۔پرانی مذہبی دھڑے بندیاں تے لہور تے پشور دی چوناں دے رزلٹ توں سوچی

پئی ہوئیاں سن کہ فیض آباد دھرنے نے انہاں نوں چوکنا کر دتا۔بس فٹا فٹ پنج دینی جماعتاں دا سیاسی اتحاد بحال کرن دا اعلان سامنے آ گیا۔ انہاں جماعتاں نیایہہ اعلان وی کیتا ہے کہ 2018 دے عام انتخابات وچ ایم ایم اے دے پلیٹ فارم توں حصہ لتا جائے گا۔ پنج وڈی دینی جماعتاں دے اجلاس دے بعد کراچی وچ سانجھی پریس کانفرنس توں خطاب کردے ہوئے جمعیت علمائے پاکستان دے راہنما تے متحدہ مجلس عمل دے سابق پردھان علامہ شاہ احمد نورانی مرحوم دے صاحبزادے شاہ اویس نورانی نے آکھیا کہ متحدہ عمل نوں دوبارہ بحال کرن تے سب اتفاق کرلتاجے۔ اک مہینے دے اندر تنظیم سازی مکمل کیتی جاسی اتے منشور کمیٹی فوری کم شروع کردے گی۔ ایم ایم اے اپنے پرانے انتخابی نشان کتاب تے آئندہ انتخابات وچ الیکشن وچ حصہ لوئے گی۔ طویل اجلاس وچ جماعت اسلامی دے امیر سینیٹر سراج الحق جمیعت علمائے اسلام دے سربراہ مولانا فضل الرحمن جمعیت علمائے پاکستان دے علامہ شاہ اویس نورانی مرکزی جمعیت اہل حدیث علامہ ساجد میر تے اسلامی تحریک دے علمامہ ساجد نقوی تے دوجے راہنماواں رلت کیتی ۔پنج وچوں دو سیاسی جماعتاں دا مسلم لیگ(ن) نال سانگا ہے تے ہک دا تحریک انصاف نال کہ جے ایہہ تنوں جماعتاں اپنے پرانے اتحادیاں نوں چھڈ دین تے پی ٹی آئی نوں بہوں اوکڑاں آن گیاں۔پر اینج جاپدا ہے پئی ایہہ ہشیار اعلان ہورے سینیٹ وچ اپنے اپنے پردھان اتحادیاں توں ودھ توں ودھ سینیٹر بناون دا پربندھ ہے۔ویسے وی پچھلی چوناں وچ انہاں سب وکھ وکھ رلت کیتی سی تے ایس پاروں ہن رل کے عوام نال رابطے کرن نال ہورے کوئی فیدہ ہو جائے۔جے کوئی نویں مذہبی جماعت اگے نکل گئی تاں فیر انہاں دی سیاستاں ہور سکڑ جان گیاں۔دس سال بعدوں ایم ایم اے دی کیوں بحالیاں ہوئیاں ایس بارے گلاں گھٹ تے اندازے وادھو پئی اک زمانے وچ ایس مشرف دی ہشیار حمائیتاں کیتیاں سن پر اج ہورے اوہی قوتاں نویں مذہبی دھڑے بندیاں اسار رہے نیں۔سوال ایہہ وی ہے کہ کیہہ ایہہ پرانی مذہبی دھڑے بندیاں آون والے ویلے وچ کسی ایران مخالف محاذ دی ھمائیتی نہیں؟فصل الرحمن دا اپنے جلسہ وچ ایرانی لیڈراں تے امام کعبہ نوں بلانا ہک ہشیار اشارہ سی؟سینیٹ دی چوناں بعدوں سب سوالاں دے جواب آ جان گے۔