لاہور(مانیٹرنگ رپورٹ)افغان باشندیاں نوں پاکستانی بناون خلاف اک وار فیر حکم آیا ہے کیونجے ایہہ مسئلہ کوئٹہ تے کراچی وچ بہوں چوڑ ہو چکیا ہے۔بلوچستان ہائی کورٹ اپنے دو تازے حکمنامیاں وچ اک پاسے افغان باشندیاں دی وکھری گنتری کرن تے زور دتا تے دوجی تھاں ایہہ وی آکھیا پئی مردم شماریاں وچ اوہ بلوچ وی رلتی ہونے چاہیدے نیں جہیڑے عارضی طور تے بلوچستان توں باہر گئے ہوئے نیں۔ایہہ حکمنامہ اک آئینی پٹیشن پاروں آیا ہے جہیڑی بلوچستان نیشنل پارٹی(بی این پی) دے وڈے لیڈر غلام نبی مینگل ہوراں جمع کروائی سی۔ ایس

پٹیشن تے فیصلہ اک ڈویڑن بینچ سنایا جس دی پردھانی جج محمد ہاشم خان کاکڑ تے جج عبداللہ بلوچ کر رہے سن۔پٹیشن وچ دسیا گیا سی پئی بلوچستان وچ مانو گنتری کروانا ممکن نہیں کیونجے اک تے ایس صوبے دے بہوں ضلعیاں وچ افغان مہاجر وسدے نیں تے دوجا بہوں سارے بلوچاں نوں مجبوری وچ بلوچستان چھڈ کے باہر جانا پیا ہے۔ایس موقعہ تے پٹیشنر ولوں میر عطااللہ لانگو،آغا حسن تے جمیل رمضان وکیلاں دی حیثیتاں وچ پیش ہوئے۔ادارہ شماریات پاکستان دے نمیندے وی عدالت وچ پیش ہوئے اتے دوجے متعلقہ اداریاں والے وی عدالت وچ سن۔شماریات والیاں عدالت نوں دسیا پئی اوہ افغان مہاجراں دی وکھری گنتری دا پکا بندوبست کیتا جے اتے نادرا نال رل کے عارضی طور تے صوبے توں باہر رہن والیاں نوں گنن دا وی رستہ کڈھ لتا ہے۔چیتے رہے پئی بلوچستان نیشنل پارٹی دے میر حاصل بزنجو سنے سب بلوچ لیڈراں اجہے مطالبے پہلاں توں کیتے سن۔