نواں کٹا:جنوبی پنجاب وانگ ہن جنوبی سندھ آفاق ڈیمانڈ کر دتی

2017 ,ستمبر 18



لاہور(مانیٹرنگ رپورٹ)نویں نویں کھڈاری اتے نویں نویں مطالبے سیاستاں وچ وڑن نوں تیار اتے پرانے کھڈاری وی نویں حساب کتاب نال لیس۔ پاکستانی سیاستاں ہور دی ہور ہو رہیاں نیں۔جیہڑے ادارے سیاستاں وچ پیر پان توں نہیں مڑدے ہن انہاں لئی ’’ساداتی عزتاں‘‘ بچانیاں اوکھیاں۔نواں مطالبہ مہاجرقومی موومنٹ دے آفاق ہوراں ولوں آیا جے جیہڑاسندھ دی ونڈ تے اْساریا گیا ہے۔ایہہ مطالبہ تے پاکستانی تریخ وچ اوس دیہاڑ ہی ہو گیا سی جداں1950 دے دہاکے دے شروع وچ سائٹ انسپکشن کمیٹی کراچی دے عارضی مرکز دی تھاں نواں کیپیٹل لبھن دی مہماں تیزکیتیاں سن۔کراچی صوبہ محاذ کس، کیوں بنایا سی ایس دا سب نوں پتہ ہے۔
1973دا آئین تے صوبیاں نوں ونڈن دی تھاں صوبیاں نوں منن دی گل کردا ہے کہ بھٹو ہوراں نوں پتہ سی پئی سٹیبلشمنٹ کیہہ کجھ کر سکدی ہے۔ پر بھٹو دے نکمے پچھ لگ اجیہا ویژن نہیں رکھدے۔ضیا الحق اوہ پہلا حکمران سی جس سرکاری پدر تے پنجابی زبان نوں ونڈیا کیونجے بنگالی اکثریت توں جان چھڈان بعدوں ہن سٹیبلشمنٹ نویں اکثر یت دے دوالے سی پر بڑی ہشیاری سگوں مکاری دے نال۔ہر صوبے وچ نویں صوبے دی گلاں چھیڑن دا سامان کیتا گیا پئی آون والے ویلے دی تیاریاں سن۔جمہو ری اداریاں خصوصی طور تے سینیٹ نوں تگڑا کرن دی تھاں ایہہ آکھیا گیا پئی وڈا صوبہ جے ونڈیا جائے تے تہانوں فیدے ہون گے۔دوجے صوبیاں وچ بہوں ہرکارے ایس گل نال جڑ گئے۔پر ایم کیو ایم دا ماملہ دوجا ہے پئی اوہ تے اپنے جمن توں چروکناپہلاں ہی ایس کم تے لگی سی۔
ہن ویکھو ایس ایم کیو ایمی مطالبے نوں کون کون گھاہ پاندا ہے؟کجھ چپ رہ کے حمائیتاں کرن گے تے کجھ کھل کے، پر اینج جاپدا ہے پئی کرچی توں سعید غنی دی جت ہضم نہیں ہو رہی۔وڈا قصور تے پی پی پی دے اپنے کوڑ بیانیے دا ہے پئی تساں دوجے صوبے توڑن دی گل کرو گے تاں اجہی گلاں کیوں نہیں ہون گیاں۔تاج حیدر ہزارے صوبے دی گل کردا رہیا ہے تے گیلانی جنوبی پنجاب دی، پر انہاں اپنی اپنی تھاواں وچ پارٹی نوں اگے لیجاون لئی کجھ نہیں کیتا۔این اے120وچ نویں کھڈاری سیاسی کھاڑے وچ ہشیاری نال لائے گئے نیں تے دوجے پاسے آفاق ہوراں کل لانڈھی دی الحمزہ گراونڈ وچ نواں مطالبہ کر دتا۔ایہہ نویں کھڈاری تنّوں پاپولر پارٹیاں توں خراج لینا چاہندیاں نیں۔پر گل خراج تے رکنی نہیں۔کراچی دی محرومیاں دی گل کرن والے فرقہ پرست لیڈراں وانگ آپ تے مال بنادے نیں تے غریباں نوں بلدی دے بوتھے لاندے نیں۔پر جے پیپی پی دا آپدا بیانیہ ہی کوڑ ہے تاں اجہی قوتاں تگڑیاں ہون گیاں۔

متعلقہ خبریں