اسلام آباد(مانیترنگ)پاکستان کی سپریم کورٹ میں پاناما لیکس سے متعلق درخواستوں کی سماعت کے دوران وزیر اعظم کے صاحبزادے حسین نواز کی طرف سے جو اضافی دستاویزات جمع کروائی گئی ہیں ان میں لندن فلیٹس کے بارے میں قطری شہزادے کا ایک اور خط بھی پیش کیا گیا ہے۔

قطری شہزادے شیخ حماد بن جاسم بن جابر الثانی نے اس دوسرے خط میں اپنے دنیا میں پھیلے ہوئے کاروبار کا ذکر کیا ہے۔

عدالت میں پیش کیے گئے اس خط میں یہ بھی کہا گیا ہے کہ وزیراعظم میاں نواز شریف کے والد میاں شریف نے سنہ 1980 میں قطر میں

قطری شہزادے نے اس خط میں یہ بھی کہا ہے کہ اُن کے ذمے میاں شریف کے 80 لاکھ امریکی ڈالر واجب الادا تھے جو سنہ 2005 میں نیلسن اور نیکسول کمپنیوں میں شیئر کی صورت میں ادا کیے گئے۔

خط میں مزید کہا گیا ہے کہ ان کمپنیوں کے بیئرنگ سرٹیفکیٹس کی ادائیگی لندن کی ایک کاروباری شخصیت وقار احمد کے ذریعے کی گئی۔

خط میں یہ بھی کہا گیا ہے کہ الثانی خاندان کا ایک نمائندہ جدہ میں شریف فیملی سے ملا تھا اور لندن میں انٹربینک ریٹ پر رقم کی ادائیگی پر اتفاق ہوا تھا۔

قطری شہزادے نے اپنے خط میں مزید کہا ہے کہ اُن کے والد اور میاں نواز شریف کے والد کے درمیان کاروباری تعلقات تھے اور اُن کے بڑے بھائی کاروباری معاملات کو دیکھا کرتے تھے۔

واضح رہے کہ یہ دوسرا خط ہے جو قطری شہزادے کی طرف سے لکھا گیا ہے اس سے پہلے گذشتہ برس نومبر میں مذکورہ قطرے شہزادے کا پہلا خط عدالت میں پیش کیا گیا تھا۔

ادھر پاناما لیکس سے متعلق درخواستوں کی سماعت کے دوران سپریم کورٹ نے وزیر اعظم کی بیٹی مریم نواز شریف کے وکیل شاہد حامد کو مخاطب کرتے ہوئے کہا کہ اگر آمدن کو تحفے میں ظاہر کیا جائے تو یہ تاثر ملتا ہے کہ اُن کی موکلہ ابھی تک زیر کفالت ہیں۔

اس پانچ رکنی بینچ میں شامل جسٹس اعجاز افضل کا کہنا تھا کہ ابھی تک زیر کفالت پر قانون خاموش ہے اور اس لفظ کے بارے میں ڈکشنری میں جو معنی لکھے ہوں گے اُنہی پر بھروسہ کیا جائے گا۔