لاہور(مانیٹرنگ رپورٹ) سعودی عرب دے نال ودھدے ہوئے سانگیاں پاروں ایرانی ،پاکستان توں خش نہیں ا تے ایس دا غصہ ودھدا جارہیا ہے۔ وزارت خارجہ دے سینئر عہدیداراں نے دسیا کہ اسلامی فوجی اتحاد دی کمانڈ سابق آرمی چیف راحیل شریف نوں دین تے ایرانیاں رابطے کیتے نیں اتے آکھیا ہے پئی ایہہ سعودی اتحاد فرقو جے۔ ایرانیاں پاکستانی خارجہ آفس نوں اسلامی فوجی اتحاد دی کمانڈ دے حوالے توں پاکستان نوں مڑ سوچن دا آکھیا ہے ۔ پاکستان دا کہنا ہے کہ اسلامی فوجی اتحاد دہشت گرداں دے خلاف ہے اتے سانوں امید ہے اسی ایران نوں

منا لواں گے۔ اسی ایران نوں یقین دہائی کرائی ہے جے ایہہ فرقو اتحاد ہویا تے اسی ایس چوں نکل جاواں گے۔ چیتے رہے پئی پاکستان نے راحیل شریف نوں سعودی عرب دی قیادت وچ اسلامی فوجی اتحاد دی کمانڈ دی اجازتاں دتیاں سن۔ایران نال سانگیاں پاروں ہی پاکستان نے راحیل شریف نوں این او سی دین وچ بہوں ویلہ لایا سی۔پاکستان وچ ایرانی سفیر ایہہ گل کیتی سی پئی کسی وی اتحاد وچ رلن بارے فیصلہ کرن وچ پاکستان آزاد ہے پر ساڈے خیال وچ ایس اتحاد دا ٹیچا ات گردی نہیں۔دی نیشن اخبار اج ایس بارے جیہڑی خبر چھاپی ہے اوس وچ خارجہ دفتر دے ہک ہور افسر دے حوالے نال ، ناں لکھے بغیر ، لکھیا ہے پئی سعودی عرب سانوں پکیاں کیتا ہے کہ ایہہ اتحاد ایران مخالف نہیں۔ایران دا ایہہ آکھنا ہے پئی سعودی اتحاد ایران ہی نہیں سگوں اہل تشیع دے وی خلاف ہے۔