لاہور (مانیٹرنگ رپورٹ)کم والی تھاواں تے زنانیاں نوں جنسی طور تے ہراساں کرن خلاف بنائے گئے اک چنگے قنون نال ہرکارے اوہی سلوک کر رہے نیں جہیڑا پہلے والے قنوناں نال کر دے رہے نیں۔پہلاں وچ وڑ کے کسی چنگے قنون دا بھیڑا ورتارا کرو اتے پھیر لک تے ہتھ رکھ کے آکھو پئی ایس قنون دا کوئی فیدہ نہیں، ایس نوں مکا دیو۔ایہہ بھیڑا ورتارا انہاں تھاواں تے ہی ہورہیا ہے جتھے زنانیاں وڈی گنتری وچ کم کر دیاں نیں۔پچھلے دناں لہور دے اک وڈے تعلیمی ادارے وچ اک اجہے، باہروں پڑھ کے آئے ہسٹری دے استاد خلاف یونیورسٹی انتظام

یہ نے ایہہ ہتھیار ورتیا سی۔انتظامیہ پہلاں اک من مرضی دی کمیٹی بنائی اتے پھیر اوس اونترے استاد نوں ترے میٹنگاں کر کے فارغ کر دتا سی۔ اوہ استاد عدالت وچ چلا گیا تاں سارا ماملہ کھل گیا تے عدالتاں وچ ثابت ہو گیا پئی ایہہ اک جعلی کیس بنایا گیا سی اتے کڑیاں نوں رلایا گیا سی۔استاد نوں تے بحال کرنا پیا پر ”جرم دی ٹریل“ نوں کسے نہ لبھیا اتے ناں کسے نیں اوس ”کمیٹی“ نوں رگیدیا۔ایہہ کوئی اکلا کیس نہیں۔سول سوسائٹی تے دانشوراں نے ایس قنون نوں بناون وچ بڑیاں محنتاں کیتیاں سن اتے اسمبلی دی زنانی ممبراں تے اپنی پارٹیاں وچ لڑ کے ایس دی حمائیتاں کروائیاں سن۔جے کوئی اپنے فیدیاں لئی ایس قنون دا بھیڑا ورتارا کردا ہے اوس نوں تے وڈی سزا ہونی چاہیدی ہے۔اجہی کوئی صورت نہیں ہونی چاہیدی پئی کوئی پرنسپل، وائس چانسلر یا ادارے دا وڈکا ایس قنون نوں اپنے ویریاں خلاف ورت سکے۔ہونا تے ایہہ چاہیدا سی پئی عدالتی فیصلے بعدوں ہائر ایجوکیشن کمیشن اوس تعلیمی ادارے تے کمیٹی نال پچھ پڑتیت کردی اتے انہاں نوں اوہی سزا دیندی جہیڑی اونہاں نے استاد نوں دتی سی تے پھیر ایس نوں میڈیا وچ لیایا جاندا تانجے جعلی کیس بناون والیاں نوں کن ہو جاندے۔جنہاں زنانیاں جھوٹا اکزام لایا سی انہاں نوں وی سدیا جاندا اتے جس شریف انسان دی عزتاں نوں رولیا گیا سی اوس نوں مڑ عزتاں دتیاں جاندیاں۔ذرا غور کرو، جے کوئی انتظامیہ دی کرپشن بارے گل کرے تے سب توں ودھیا”نواں“ ہتھیار ایہہ ہے
پئی تساں اوس خلاف کجھ زنانیاں نوں رلا کے کیس بنا دیو۔ایہہ ایس قنون دی سپرٹ دے خلاف ہے اتے ایس بارے ہر کسے نوں نظر رکھنی لوڑی دی ہے۔میڈیا نوں تے اجہیا ٹیکر چلاون توں پہلاں لکھ وار سوچنا چاہیدا ہے کیونجے ہر ادارے وچ ہرکارے وادھو نیں۔میڈیا نے وی ایس قنون دی وڈی حمائیتاں کیتیاں سن اتے ہن ایس قنون تے پہرا دینا وی لوڑی دا ہے۔زنانیاں دے حقاں لئی کم کرن والی این جی اوز نوں ایس بارے دھیان دینا چاییدا جے۔