لندن(مانیٹرنگ ڈیسک):امیگریشن ٹریبونل نے انہاں’’ بھیڑیاں‘‘ نوں اپنے ملک توں کڈہن دا حکم جاری کردتا۔ ایہہ 9 بندے 13 سال توں چھوٹی بچیاں نوں شراباں تے نشے دے کم نال جنسی زیادتیاں کردے سن۔ ایہہ شمالی انگلینڈ وچ رچڈیل وچ رہندے سن۔ شبیر احمد نوں 2012 وچ 22 سال لئی قید ہوئی سی۔ باقی تناں وچ عادل خان، قاری عبدالرؤف تے عبدالعزیز شامل سن اتے شبیر توں اڈ باقی تناں نوں ضمانتاں تے رہائی ملی ہوئی سی۔ شبیر تے ریپ تے دوجے ہور الزام وی سن۔ جہناں 5 بچیاں نے ایس بارے اپنے نال ہون والی زی

ادتیاں بارے دسیا اوہ سب انگریز سن۔ ایہہ 9 بندے نہ صرف آپ بالڑیاں نال جنسی زیادتیاں کردے سن سگوں رقماں پھڑ کے گاہک وی لیاندے سن۔مطلب ایہو ہے پئی ایہہ دلالی وی کر دے سن۔ شبیر انہاں دا لیڈر سی۔ انہاں مجرماں بچن لئی انسانی حقاں دا آسرا وی لتا اتے یورپین کورٹ آف ہیومن رائٹس وچ گئے پر اتھے وی فیصلہ انہاں دے خلاف ہی آیا۔ خبراں وچ چار پاکستانیاں دی خبر تے ہے پر نہ تے 5 افغانیاں دے ناں نیں اتے نہ ہی انہاں نوں کڈہن بارے کوئی خبر۔ کیہ الطاف حسین وانگ ایہہ افغانی وی نواں ’’اثاثہ‘‘ تے نہیں، سلطنت دا؟ شبیر احمد پہلاں تے ایس مقدمہ نوں مسلماناں خلاف اک سازش آکھدا رہیا اتے بعد وچ بالڑیاں نوں جسم فروش آکھیا۔ ایہہ سب برطانیہ دی شہرتیاں لینا چاہندے سن۔ شہریت دیناں اک ’’حق‘‘ نہیں سگوں رعائیت ہے اتے اساں رعائیت واپس وی لے سکدے ہاں۔ ہوم سیکٹری ایہہ رعائیت کینسل کرن دا اختیار رکھدا ہے ۔ ایہہ گل امیگریشن دے وزیر رابرٹ گڈول ہوراں آکھی۔ شبیر 1967 توں برطانیہ رہ رہیا اتے اوس دے اکاوٹنٹ وچ 83 ہزار پونڈ نیں۔ برطانیہ دے امیگریشن قنوناں پاروں انہاں نوں فوری طور تے پاکستان گھلنا ممکن نہ ہوئیگا۔ ایہہ قنونی جنگ نال کجھ وقت ہور لے سکدے نیں۔ مقدمہ سنن والے جج ہوراں مجرماں دے وکیل نوں وی سد ھیاں سدھیاں سنائیاں۔ میڈیا دے کجھ حلقے ایس مقدمے بارے اینج دی رپورٹنگ کررہے نیں جس نال ایہہ تاثر ملدا ہے پئی ہر امیگرینٹ اینج دا ہی ہوسی یا فیر ہر پاکستانی تے افغانی اینج دا ہی ہوسی۔ اجہی رپورٹنگ کیس نوں خراب ہی کرسکدی ہے اتے انہاں جنسی مجرماں دی حمائیت وچ کجھ لوکاں دے دل نرم وی ہوسکدے نیں۔ اج کل امیگرینٹس بارے جو خبراں چل رہیاں نیں انہاں وچ کجھ لوک ایہو چاہندے نیں۔پر مکدی گل ایہہ ہے پئی جرم نوں جرم ہی سمجھنا تے رپورٹ کرنا چاہیدا ہے بھانویں اوہ کوئی امیگرنٹ کرے یا فیر مقامی گورا، کوئی مسلمان کرے یا مسیحی۔جڈاں اساں جرم نوں خانیاں وچ ونڈ کے ویکھدے ہاں تاں جرم دی تھاں زور دھرم یا قومیتاں ول زیادہ ہو جاندا ہے۔بریگسٹ تے ٹرمپ بعدوں ایہو ہو رہیا جے۔جڑا کے پاکستانیاں وستے کوئی چنگی گل نیں اے۔